Lajmetereja | --:-- | Kosovë & Rajoni
Politikë

Zgjerimi i BE-së, Rama kërkon tryezë të përbashkët për 7 vendet e rajonit dhe kritikon politikën evropiane

Redaksia Lajmetereja • 16-11-2026 15:22
Shpërndaj:
Reklamë e Sponsorizuar
Zgjerimi i BE-së, Rama kërkon tryezë të përbashkët për 7 vendet e rajonit dhe kritikon politikën evropiane
Kryeministri Edi Rama ka bërë thirrje për një qasje të freskët nga ana e Bashkimit Evropian lidhur me procesin e zgjerimit, duke sugjeruar që të shtatë shtetet e Ballkanit Perëndimor të kenë vendin e tyre në tryezën evropiane, gjithnjë duke ruajtur parimin e pandryshueshëm të integrimit të mbështetur te merita individuale. Gjatë fjalës së mbajtur në Forumin e II-të të Zgjerimit të BE-së në Bruksel, shefi i ekzekutivit shqiptar vlerësoi se Plani i Rritjes shërben si një mekanizm që mishëron këtë filozofi, ndonëse hendeku zhvillimor mes rajonit tonë dhe bllokut evropian vazhdon të jetë mjaft i theksuar. Kreu i qeverisë refuzoi kategorikisht çdo alternativë tjetër jashtë anëtarësimit të plotë, duke përmendur rastin e diskutimeve për një status të asociuar për Ukrainën. Sipas tij, rruga drejt BE-së duhet të mbetet e lidhur ngushtë me reformat dhe meritat, pasi ky ritëm është në funksion të interesit direkt të vetë vendeve kandidate. “Kam luftuar për këtë gjë prej një kohe të gjatë dhe mendoj se Plani i ri i Rritjes në vetvete është një instrument që e pasqyron këtë qasje nga ana e Komisionit dhe BE sepse hendeku vijon të jetë i madh dhe nevoja për a) të pasur më shumë sa u takon kapaciteteve për ta mbyllur këtë hendek është e jashtëzakonshme. Mendoj se përpjekjet për të bërë gjëra si ato që ju përmendet, si anëtar i asociuar për Ukrainë për shembull, nuk shkojnë askund. Së pari sepse është një gënjeshtër dhe së dyti sepse nuk ka të bëjë me ndryshimin thellësisht të instrumentit të integrimit në BE që është një proces i mbështetur në meritë, sepse nuk është në interes të vendeve tona vetë për ta ndryshuar një gjë të tillë. Procesi i bazuar në meritë është kryesisht e mbi të gjitha një dhuratë për ne. Është një proces i cili na bën ne të aftë të bëjmë gjëra që përkundrazi nuk do të ishim në gjendje t’i bënim. Për fat të mirë jemi në mes të Europës dhe kemi BE”, deklaroi Rama. Më tej, ai drejtoi kritika ndaj dinamikës politike të vetë Bashkimit Evropian, duke theksuar se ndërsa Komisioni Evropian ushtron trysni për standarde dhe reforma, politika e vendeve anëtare shpesh krijon zhgënjim për shkak të përçarjeve të brendshme dhe dobësive institucionale. Për të dhënë një shembull se si duhet të veprohet, kryeministri solli ndërmend ish-kancelarin gjerman Helmut Kohl dhe procesin e ribashkimit të Gjermanisë, duke nënvizuar se Evropës i duhet sot i njëjti vizion dhe vullnet i fortë politik. Në optikën e Ramës, Brukseli zyrtar duhet të marrë një vendim të guximshëm politik për të ulur të shtatë vendet e rajonit në të njëjtën tryezë, ndërkohë që përfitimet konkrete dhe shpejtësia e avancimit të secilit shtet duhet të vijojnë të mbeten të kushtëzuara nga puna dhe arritjet e tyre. “BE është burimi më i jashtëzakonshëm i dijes se si ndërtohen institucionet dhe si krijohet një sistem që funksionon në vetvete. Por ajo që mendoj se mungon është politika. Mendoj se Komisioni ka të drejtën e vet të na torturojë dhe e bën në mënyrë të përsosur, por ndërkohë që falë kësaj torture e pune ne përmirësohemi, politika e BE shpesh na zhgënjen, na rrëzon për shkak të dobësisë së saj apo për shkale të konflikteve të brendshme nga njëri shtet anëtar në tjetrin. Politika është shumë pas dhe ajo që shpresoj është që sot Europa të gjejë momentin e saj Helmut Kohl. Helmut Kohl nuk shkoi në vendin ku ra muri për t’i thënë atdhetarëve të tij 'jeni të lirë, por keni nja 33 kapituj para se të jetojmë së bashku'. Ai tha: 'tashmë jemi bashkë, pjesa tjetër do të vijë'. Kështu që mendoj se ka ardhur koha për Komisionin Evropian, Këshillin dhe shtetet anëtare t’i sjellë të 7 vendet t’i ulë rreth tryezës. Secili prej të 7 duhet të jetë pjesë e tryezës, por se cili mund të përfitojë nga tryeza, atë e thotë procesi i bazuar në meritë”.
Reklamë e Sponsorizuar
Ky artikull është përgatitur dhe verifikuar nga redaksia e Lajmet e Reja. Të gjitha të drejtat janë të rezervuara.
Reklamë e Sponsorizuar
Shpërndaj këtë lajm:

Lajmet e Reja, gjithmonë me ty

Ndiq lajmet më të fundit edhe nga aplikacioni në telefon.

Privatësia dhe Cookies

Ne përdorim cookies dhe teknologji të palëve të treta (si Google AdSense) për të analizuar trafikun dhe për të personalizuar përmbajtjen dhe reklamat. Duke vazhduar navigimin, ju pranoni përdorimin e tyre. Lexoni më shumë në Politikën e Privatësisë.

Reklamë e Sponsorizuar