Aktuale
Zgjerohet prania institucionale: Inaugurohet zyra e Avokatit të Popullit në Mitrovicë të Veriut
Reklamë e Sponsorizuar
Institucioni i Avokatit të Popullit ka bërë të mundur hapjen e zyrës së re në Mitrovicë të Veriut, një hap ky që synon afrimin e shërbimeve dhe lehtësimin e qasjes për banorët e të katër komunave në këtë rajon.
Naim Qelaj, Avokat i Popullit, u shpreh se kjo nismë përbën një përgjigje direkte ndaj kërkesave të shpeshta të qytetarëve, të cilët gjatë bashkëbisedimeve kishin evidentuar pengesat dhe sfidat për të arritur te shërbimet e këtij institucioni.
Sipas tij, ambientet e reja tashmë janë plotësisht funksionale dhe të përgatitura për të trajtuar ankesat e palëve, si dhe për të organizuar takime të hapura me qytetarët.
Në ceremoninë inauguruese ishte i pranishëm edhe Dushan Radakovic, drejtor i organizatës joqeveritare ACDC, i cili e cilësoi këtë zhvillim si domosdoshmëri, duke pasur parasysh volumin e lartë të kërkesave që adresohen nga qytetarët dhe sektori civil në veri.
Radakovic kërkoi që kjo zyrë të jetë në shërbim të barabartë për të gjitha grupet etnike që jetojnë në katër komunat veriore, ndërsa vlerësoi lart partneritetin dhe mbështetjen e vazhdueshme që Avokati i Popullit i ka dhënë shoqërisë civile.
Nga ana e tij, zëvendësi i Avokatit të Popullit, Srdjan Sentic, e konsideroi këtë ngjarje si moment kyc për avancimin e demokracisë, mbrojtjen e të drejtave të njeriut dhe forcimin e sundimit të ligjit në veri të Kosovës.
Ai ritheksoi se garantimi i të drejtave të njeriut dhe respektimi i parimeve demokratike mbeten shtylla kryesore e misionit dhe mandatit të këtij institucioni.
Reklamë e Sponsorizuar
Ky artikull është përgatitur dhe verifikuar nga redaksia e Lajmet e Reja. Të gjitha të drejtat janë të rezervuara.
Reklamë e Sponsorizuar
Shpërndaj këtë lajm: