Botë
Progresi i Shqipërisë drejt BE-së, Ursula von der Leyen: Hapa domethënës drejt anëtarësimit
Reklamë e Sponsorizuar
Kreu i Komisionit Evropian, Ursula von der Leyen, ka vlerësuar lart rrugëtimin e Shqipërisë, duke theksuar se vendi po shënon hapa të rëndësishëm në përmbushjen e objektivave për t'u bërë pjesë e Bashkimit Evropian. Deklarata u bë gjatë punimeve të Forumit të II-të të Zgjerimit të BE-së në Brukseli, i cili zhvillohet nën fokusin “Evropë më e gjerë – Evropë më e fortë”.
“Talentet e reja të Ballkanit Perëndimor do të sjellin vlera në tregun e përbashkët evropian. Shqipëria po bën progres domethënës drejt anëtarësimit. Në vendet e BP-së, vendet po bëjnë hapa të mëdhenj. Ky është një moment i rëndësishëm. Ne duhet ta kapim këtë mundësi. Të shfaqim të njëjtën ambicie si liderët e 30 viteve më parë, që ta kthejmë në sukses”, u shpreh ndër të tjera zyrtarja e lartë e BE-së.
Duke iu referuar kontekstit historik, von der Leyen solli në vëmendje valën e madhe të zgjerimit të tri dekadave më parë, periudhë gjatë së cilës shtetet e Evropës Qendrore dhe Lindore nisën rrugën drejt ribashkimit me familjen e tyre të përbashkët evropiane.
Ndërkohë, komisionerja Evropiane për Zgjerimin, Marta Kos, vuri inkurajimin e saj në faktin se procesi i zgjerimit është kthyer fuqishëm në fokusin e agjendës politike, duke shënuar këtë vit rezultate të papara në dy dekadat e gjysmë të fundit.
“Sot zgjerimi është sërish në një debat të gjerë se si. Kemi dhënë rezultate për zgjerimin këtë vit më shumë sesa në 25 vitet e fundit. Kemi kundërshtarë që duan të dëmtojnë kandidatët për anëtarësim. Nuk do ta lejojmë të ndodhë kjo”, përfundoi Kos.
Reklamë e Sponsorizuar
Ky artikull është përgatitur dhe verifikuar nga redaksia e Lajmet e Reja. Të gjitha të drejtat janë të rezervuara.
Reklamë e Sponsorizuar
Shpërndaj këtë lajm: