Policia e Kosovës rishpall konkursin për 450 rreshterë: Çfarë duhet të dini për procesin e ri

Policia e Kosovës ka ndërmarrë hapat për shpalljen e konkursit për gradën e rreshterit, duke hapur rrugën për plotësimin e 450 pozitave të reja. Ky është tentimi i tretë i institucionit për të finalizuar këtë proces, pasi dy përpjekjet e mëparshme dështuan për shkak të parregullsive të evidentuara gjatë zhvillimit të tyre. Kujtojmë se proceset e kaluara u shoqëruan me ndërhyrje ligjore, përfshirë rekomandimet e Gjykatës Supreme, e cila kishte anuluar udhëzimin administrativ për gradat e rreshterit dhe togerit. Lidhur me atë se sa janë adresuar këto mangësi në konkursin aktual dhe garancitë për mbarëvajtjen e procesit, Policia e Kosovës nuk ka ofruar përgjigje për interesimin e mediave gjatë javës. Kryetari i Komisionit për Siguri, Mefail Bajqinovci, ka shprehur mbështetjen për këtë vendim, duke e cilësuar si një nevojë urgjente. Ai theksoi se rikthimi te udhëzimi i vjetër është një hap i nevojshëm, duke kritikuar faktin se për 12 vite pjesëtarët e policisë nuk kanë pasur mundësi të gradohen, gjë të cilën ai e cilësoi si shkelje të të drejtave të punonjësve. Edhe ish-eprori i Policisë së Kosovës, Refki Morina, e ka vlerësuar pozitivisht këtë nismë. Sipas tij, plotësimi i këtyre vakancave është jetik për forcimin e strukturave udhëheqëse, duke shtuar se nevojitet një proces i ngjashëm edhe për gradat e tjera, si toger, kapiten, major dhe kolonel, me qëllim të rritjes së profesionalizmit operacional. Morina, i cili është nënkolonel në pension, nënvizoi rolin kyç të rreshterit si vija e parë e menaxhimit të rasteve. Ai shpjegoi se mungesa e kësaj grade ka detyruar shpesh policë pa përvojën e duhur të marrin përgjegjësi menaxheriale, ndërsa me këtë konkurs synohet që pozitat të plotësohen nga kuadro të kualifikuara që do të udhëheqin patrullat me më shumë përgjegjësi. Në të njëjtën linjë qëndron edhe ministri i Punëve të Brendshme, Xhelal Sveçla, i cili e ka mirëpritur këtë zhvillim. Sipas tij, ky konkurs përfaqëson një mundësi të rëndësishme për avancimin në karrierë të të gjithë atyre zyrtarëve policorë që po shërbejnë me përkushtim dhe profesionalizëm ndaj vendit.