Volejboll: Tirana ngec në Korçë, Partizani triumfon ndaj Vllaznisë në javën e shtatë

Java e shtatë e Superligës së volejbollit për meshkuj ka mbyllur siparin e fazës së parë të kampionatit. Skuadra e Studentit, e cila nuk zhvilloi asnjë përballje këtë javë për shkak të kalendarit, e mbyll këtë pjesë të sezonit si kryesuese e tabelës së klasifikimit. Partizani, kampion në fuqi, ka regjistruar një fitore të rëndësishme ndaj Vllaznisë me rezultatin 3-1 (25-22, 25-27, 25-20, 25-16). Ndonëse përballja mes dy ekipeve ishte mjaft e luftuar dhe me rivalitet të lartë, volejbollistët kryeqytetas arritën të bëjnë diferencën në momentet vendimtare të takimit. Në anën tjetër, Tirana ka zhgënjyer me paraqitjen e saj në transfertën korçare. Bardheblutë u mposhtën pastër 3-0 nga vendasit e Skënderbeut (26-24, 25-19, 25-17). Përveç setit të parë, ku u shfaq njëfarë baraspeshe, pjesa tjetër e lojës u dominua plotësisht nga skuadra e Skënderbeut, e cila e meritoi fitoren e arritur. Një ndeshje maratonë dhe plot emocione u zhvillua në Elbasan, ku vendasit u mundën 3-2 nga Erzeni (25-23, 25-22, 17-25, 18-25, 18-20). Për shijakasit, ky sukses shënon fitoren e parë në kampionat, ndërkohë që Elbasani është ngushëlluar me marrjen e pikës së parë sezonale. Pas shtatë javësh, renditja e Superligës paraqitet si vijon: Studenti kryeson me 17 pikë, ndjekur nga Skënderbeu me 12 pikë, Partizani me 11 pikë, Tirana me 10 pikë, Vllaznia me 9 pikë, Erzeni me 3 pikë dhe Elbasani me 1 pikë.