Përplasje e fortë në “Goca dhe Gra”: Jonida Maliqi akuzon psikologen se e trajtoi të birin si ‘bankomat’

Momente tensioni kanë shoqëruar puntatën e fundit të emisionit “Goca dhe Gra”, ku këngëtarja e njohur Jonida Maliqi është përballur me psikologen Anjeza Dishnica. Në qendër të debatit ishte mënyra e trajtimit dhe vlerësimit të fëmijëve që ndodhen në spektrin e autizmit, një temë kjo shumë e ndjeshme për Maliqin, e cila ka rrëfyer më herët sfidat e saj si prind i një djali me autizëm. Diskutimi u fokusua te rëndësia e një qasjeje profesionale dhe humane në këto raste. Psikologia Dishnica nënvizoi se vlerësimet duhet të bëhen nga ekipe të specializuara, duke përmendur gjithashtu përvojën e saj të gjatë që prej vitit 2009. Ajo shpjegoi rëndësinë e terapisë ABA, e cila aplikohet në vendin tonë prej vitit 2014, si një metodë që ndihmon në zhvillimin e aftësive individuale dhe socializimin e fëmijëve. Megjithatë, tonet u ngritën kur biseda kaloi te përvoja personale e këngëtares. Jonida Maliqi nuk nguroi të shprehte pakënaqësinë e saj të thellë për mënyrën se si i ishte komunikuar diagnoza e të birit vite më parë. Sipas këngëtares, kjo përvojë kishte lënë gjurmë traumatike tek ajo dhe bashkëshorti i saj, duke minuar besimin e tyre ndaj profesionistëve të fushës. Akuzat e Maliqit ndaj psikologes ishin të drejtpërdrejta dhe të rënda. Ajo pohoi se Dishnica i kishte rekomanduar një regjim intensiv prej 5-6 orësh terapi në ditë në qendrën e saj private, duke e këshilluar madje që ta mbante të birin larg kopshtit dhe shkollës. “Ti i ke parë fëmijët si bankomate, e dashur. Dhe këtu ndahet mjekësia me njerëzoren”, deklaroi këngëtarja, duke pretenduar se qëllimi i psikologes ishte përfitimi financiar përmes orëve të shumta të terapisë. Nga ana tjetër, Anjeza Dishnica u mbrojt duke argumentuar se identifikimi i nevojave të fëmijës kishte nisur që në takimin e parë me familjen. Përplasja e hapur mes tyre nxori në pah këndvështrime të kundërta mbi etikën profesionale dhe nevojën për mbështetje më të sinqertë e njerëzore për prindërit që përballen me vështirësi në zhvillimin e fëmijëve të tyre.