Saranda pa kinoteatër, Ina Zhupa: Bashkia nuk ka treguar asnjë vullnet për ta rikthyer në funksion

Kryetarja e Komisionit për Edukimin dhe Mjetet e Informimit Publik, Ina Zhupa, ka adresuar një shqetësim të kahershëm gjatë shqyrtimit të buxhetit të Qendrës Kombëtare të Kulturës. Ajo ka ngritur zërin për gjendjen e mjerueshme të jetës kulturore në Sarandë, ku prej vitesh e vetmja sallë kinoteatri qëndron e mbyllur dhe e braktisur. Zhupa ka kërkuar sqarime nga autoritetet përkatëse se përse qyteti bregdetar nuk është bërë pjesë e planeve për rikonstruksion dhe rijetëzim të hapësirave kulturore. Në përgjigjen e tij, drejtuesi i Qendrës Kombëtare të Kulturës, Jonid Jorgji, ka bërë të qartë se institucioni që ai drejton nuk ka pasur asnjë kërkesë nga ana e Bashkisë Sarandë, duke konfirmuar mungesën e iniciativës nga pushteti vendor për të përfituar fonde. Deputetja demokrate nuk i ka kursyer kritikat e ashpra ndaj bashkisë, duke e cilësuar atë si pengesën kryesore për zhvillimin e qytetit. Sipas Zhupës, mosaplikimi për fonde dëshmon mungesën totale të vullnetit nga kryebashkiaku Olti Caci dhe ekipi i tij për t’i ofruar qytetarëve infrastrukturën e nevojshme kulturore. Duke e konsideruar këtë situatë si një tregues të indiferencës dhe paaftësisë, Zhupa ka prezantuar vizionin e Partisë Demokratike për Sarandën. Ajo u është zotuar qytetarëve se, pas 9 majit, fokusi do të jetë te ndërtimi i një poli të ri kulturor, me qëllim rikthimin e dinjitetit të munguar dhe largimin e modelit aktual që, sipas saj, e ka mbajtur peng qytetin.