Lëvizje në radhët e kuqezinjve: Samuele Sina i bashkohet Shpresave për sfidën me Spanjën

Mbrojtësi Samuele Sina ka ndryshuar destinacion në angazhimet e tij përfaqësuese. Ai nuk është bërë pjesë e udhëtimit të Kombëtares A drejt Budapestit, ku skuadra do të përballet me Bjellorusinë, pasi është vënë zyrtarisht në dispozicion të Kombëtares U-21. Sina do të jetë tashmë pjesë e planeve të trajnerit Alban Bushi, duke u stërvitur me grupin për ndeshjen e rëndësishme miqësore që Shqipëria U-21 do të zhvillojë kundër bashkëmoshatarëve të tyre nga Spanja. Ky takim mjaft interesant është planifikuar të luhet të martën, më 17 nëntor. Skuadrat do të zbresin në fushën e stadiumit “Air Albania”, ku vërshëllima e fillimit të ndeshjes është parashikuar të bjerë në orën 19:00.