Dueli ekonomik: Mickoski flet për stabilizim, Filipçe e rreshton vendin në fund të Evropës

Kryeministri Hristijan Mickoski ka bërë të ditur se sektori industrial po shfaq sinjale inkurajuese, duke iu referuar rritjes së qarkullimit për mbi 5,5 për qind në krahasim me tremujorin e tretë të vitit të kaluar. Sipas tij, këta parametra janë veçanërisht domethënës po të kemi parasysh ngadalësimin ekonomik në nivel global dhe sfidat me të cilat po ballafaqohet Bashkimi Evropian, partneri kryesor tregtar i Maqedonisë së Veriut. Duke komentuar këto zhvillime, Mickoski u shpreh se ky progres është një goditje për ata që shpresojnë në dështimin e vendit. Ai shtoi se pas një periudhe të gjatë prej dy vitesh e gjysmë, qeveria ka arritur të ndalojë rënien dhe të stabilizojë gjendjen në pikën zero, duke theksuar se nga ky moment e tutje pret vetëm zhvillim dhe rritje. Në anën tjetër, lideri i LSDM-së, Venko Filipçe, ka hedhur poshtë këto pretendime, duke e cilësuar ekonominë e vendit në gjendje alarmante. Duke iu referuar të dhënave të Fondit Monetar Ndërkombëtar (FMN), Filipçe theksoi se Maqedonia e Veriut mban vendin e 41-të nga 48 ekonomi evropiane për sa i përket Bruto Prodhimit Vendor (BPV) për kokë banori, duke e vlerësuar këtë si realitetin e hidhur të vendit. “Cila ekonomi e tretë? Sipas FMN-së, Maqedonia e Veriut është në fund të Evropës. Parashikimet tregojnë se BPV-ja për kokë banori do të jetë 11.762 dollarë, ndërsa para nesh renditen Serbia, Mali i Zi dhe Shqipëria. Kjo që po themi prej një viti, tani është konfirmuar zyrtarisht edhe nga FMN-ja”, deklaroi Filipçe. Sipas kreut të opozitës, retorika qeveritare për rritje të pagave dhe pensioneve është e pabazuar, ndërsa qytetarët vazhdojnë të përballen çdo ditë me pasojat e një ekonomie që, sipas tij, mbetet ndër më të pazhvilluarat në kontinent.