Thibaut Courtois zgjeron horizontet: Portieri i Realit synon blerjen e një klubi italian

Ndonëse vijon të jetë një ndër gardianët më të mirë në historinë e futbollit botëror, Thibaut Courtois ka nisur prej kohësh të planifikojë të ardhmen e tij përtej fushave të blerta. Ylli belg është angazhuar aktivisht në botën e biznesit si pjesë e “NXTPLAY Capital”, një fond investimi që përqendrohet në sektorët e sportit, teknologjisë, medias dhe markave të konsumit. Së fundmi, fondi ku Courtois dhe Gonzalo Vila mbajnë pozicionet e aksionarëve kryesorë, ka zyrtarizuar një ofertë për blerjen e plotë të aksioneve të klubit italian Reggiana, që aktualisht garon në Serie C. Ky hap shënon një zhvillim të rëndësishëm në strategjinë e tyre të zgjerimit në tregun futbollistik evropian. Reggiana nuk përfaqëson një tentativë të izoluar për dyshen Courtois-Vila, të cilët kanë investuar më herët edhe te klubi francez Le Mans FC dhe ai belg KRC Genk. Megjithatë, ambiciet për klubin italian janë të qarta dhe afatgjata. “Synimi ynë është të ndërtojmë diçka për të cilën banorët e Reggio Emilias mund të ndjehen krenarë: një klub ambicioz në fushë, i lidhur ngushtë me komunitetin dhe me një bazë të qëndrueshme për të ardhmen,” ka deklaruar portieri belg. Në vizionin e tij për këtë projekt të ri, Courtois ka theksuar se fokusi kryesor do të mbetet zhvillimi i talenteve të reja. “Krijimi i një mjedisi ideal për rritjen e lojtarëve të rinj do të jetë shtylla kryesore e gjithçkaje që do të ndërmarrim,” përfundoi ai.