Deklarata e bashkëshortes së De Bruyne shkakton zemërim te tifozët napolitanë

Përfoljet për një largim të mundshëm të Kevin De Bruyne nga Italia po bëhen gjithnjë e më të shpeshta, ndërsa fjalët e bashkëshortes së tij, Michelle, janë perceptuar si një sinjal i qartë për përfundimin e aventurës së çiftit në Napoli. Në një rrëfim për revistën 'NINA', Michelle De Bruyne ndau vështirësitë e jetesës në qytetin italian, duke theksuar se privatësia e familjes së tyre është e cenuar. Ajo krahasoi përvojën në Napoli me atë në Manchester, ku futbollisti gëzonte më shumë qetësi. 'Në Manchester njerëzit ishin më të rezervuar, ndërsa këtu është krejtësisht ndryshe. Sinqerisht, sa më shpejt të largohemi, aq më mirë do të jetë për ne', deklaroi ajo. Këto komente kanë shtuar spekulimet se mesfushori belg po mendon seriozisht rikthimin në atdhe. Michelle konfirmoi se ata tashmë po planifikojnë të ardhmen e tyre, duke shprehur dëshirën për t'u zhvendosur përfundimisht në Limburg, aty ku ndjehen më të lidhur me rrënjët e tyre. Megjithatë, kjo intervistë e dhënë në shtator ka shkaktuar një reagim të ashpër nga mbështetësit e Napolit. Shumë tifozë kanë vërshuar në profilin e Instagramit të bashkëshortes së futbollistit me komente fyese dhe kritika të forta. 'Nëse nuk ju pëlqen, mund të ikni, askush nuk ju mban me zor', 'Pyet Dries Mertens si jetohet këtu' apo 'Laj gojën para se të flasësh për Napolin', ishin disa nga mesazhet e shumta që vërtetojnë tensionin e krijuar mes familjes së lojtarit dhe komunitetit lokal.