Lëvizjet e befta në PS, Nazarko: Rama vuri në provë besnikërinë e strukturave të partisë

Analisti Mentor Nazarko, në një analizë të zhvilluar për emisionin “Kjo Javë” në News24, ka zbërthyer prapaskenat e Asamblesë Kombëtare të Partisë Socialiste, duke u fokusuar veçanërisht te kërkesat për përjashtimin e Elisa Spiropalit dhe Plarent Ndrecës. Sipas Nazarkos, këto zhvillime nuk mund të konsiderohen si rastësi, por si një strategji e mirëmenduar e komunikimit politik të kryeministrit Edi Rama. Analisti vlerëson se përmes kësaj nisme, kreu i qeverisë ka synuar të kryejë një “test force” brenda radhëve të partisë, për të matur nivelin e mbështetjes dhe për të identifikuar se kush do të guxonte të pozicionohej hapur kundër tij. Një tjetër element që Nazarko nënvizon është përpjekja e Ramës për të dominuar sërish axhendën publike. Në një periudhë kur hapësira mediatike është mbushur nga rivalët politikë, kryeministri përdor këto skenarë për të rikthyer vëmendjen te Partia Socialiste, duke mos lejuar që të mbetet i vetëm përballë opinionit publik. “Krijimi i ngjarjeve të tilla, shpeshherë me nota misteri apo edhe qesharake, është pjesë e stilit të tij politik. Rama kërkon t’i japë jetë partisë dhe ta mbajë atë në qendër të komunikimit. Në vlerësimin tim, ky ishte një test për të matur reagimet ndaj propozimeve për përjashtimin e emrave si Spiropali apo Ndreca, duke parë se sa kundërshtarë do të shfaqeshin përballë tij në strukturat partiake”, u shpreh analisti gjatë bisedës me moderatoren Nisida Tufa.