Përballja me Izraelin, Franco Foda zyrtarizon listën e Kosovës dhe zbardh lojtarin që mbetet jashtë

Përfaqësuesja e Kosovës ka zyrtarizuar pranë UEFA-s grupin prej 23 lojtarëve për sfidën e sotme kundër Izraelit, e cila vlen për xhiron e pestë të Grupit 3 në Ligën B të Ligës së Kombeve. Kjo përballje e rëndësishme do të luhet në orën 15:00, në stadiumin “Fadil Vokrri” në kryeqytet. Për këtë duel, trajneri Franco Foda fillimisht kishte grumbulluar 27 lojtarë, ku përfshiheshin edhe tri risi në skuadër. Gjatë seancave stërvitore dhe ditëve të grumbullimit, nga ekipi u larguan Valmir Matoshi dhe Erblin Osmani, ndërkohë që vendin e tyre e zuri Betim Fazliji. Më vonë, për shkak të problemeve fizike dhe lëndimeve, grumbullimin e Dardanëve e braktisën edhe Lumbardh Dellova e Ermal Krasniqi, duke reduktuar numrin e futbollistëve në dispozicion të teknikut Foda në 24. Për të plotësuar kushtet e listës përfundimtare të ndeshjes, një nga lojtarët është dashur të lirohet, dhe ai që nuk do të jetë pjesë e skuadrës kundër Izraelit është sulmuesi 18-vjeçar i Stuttgartit, Enis Rexhepi. Pavarësisht kësaj, në repartin e sulmit tekniku gjerman ka në dispozicion opsione cilësore si Vedat Muriqi, Fisnik Asllani, Baton Zabërgja, Edon Zhegrova dhe Albion Rrahmani. Objektivi i Kosovës në këtë takim është vetëm fitorja, për të ruajtur vendin në Ligën B dhe për të mbajtur gjallë ambiciet për pozitat e larta në grup.