Rama nga Asambleja e PS: Traktati i BE-së, kapitulli i fundit i një rrugëtimi që nisi mes borxheve dhe kolapsit financiar

Kryeministri Edi Rama, gjatë fjalës së mbajtur në Asambledë Kombëtare të Partisë Socialiste, e ka konsideruar procesin e integrimit të Shqipërisë në Bashkimin Europian si një pikë kthese historike, duke bërë thirrje për bashkimin e të gjitha forcave dhe kapaciteteve kombëtare për kurorëzimin e këtij synimi. Shefi i ekzekutivit theksoi se Bashkimi Europian tashmë është një realitet i prekshëm, ndërsa vendi po hyn në fazën kyçe të përgatitjes së traktatit të anëtarësimit. Duke u kthyer pas në kohë, kreu i qeverisë evokoi situatën e rëndë ekonomike dhe administrative që Partica Socialiste trashëgoi kur mori drejtimin e vendit në vitin 2013, duke përmendur gropat financiare, sfidat e mëdha dhe rrezikun e falimentimit. Në këtë kontekst, ai përmendi ndryshimet e ndërmarra në sektorin e energjisë dhe atë të drejtësisë, duke pranuar se ato kanë qenë procese të vështira dhe të shoqëruara me tensione, por thelbësore për metamorfozën e shtetit shqiptar. “Sot Europa është e prekshme me sy, përmes vetë gishtit të KE-së, që tregon se ky është momenti për të nisur përgatitjet për traktatin historik që do ta bëjë Shqipërinë anëtare të BE-së. Si mundemi ne, në këtë moment historik, të mos i mbledhim të gjitha mendjet, vullnetet dhe energjitë tona për ta bërë realitet edhe këtë faqe të fundit të një libri që ka nisur të shkruhet që kur nuk mbahet mend dhe që ne e gjetëm si një libër borxhesh, me borxhe në të gjithë sektorët, dështime, kërcënimin e një kolapsi financiar dhe mungesë shprese se Shqipëria mundësohej ndonjëherë si shtet europian? Në vitin 2013, njerëzit na kërkonin gjëra krejt elementare. Sapo ne filluam reformën e energjisë, Shqipëria nisi të zgjohej me ndjesinë se kishte filluar një faqe e re e shtetbërjes. Ndaj jemi ne këtu të parët që nuk kemi të drejtë ta harrojmë se pas traktatit të anëtarësimit të Shqipërisë janë vite pune. Edhe reforma në drejtësi, më të rinjtë këtu nuk e kanë idenë se me çfarë tensioni e kemi çuar përpara, me sa përplasje dhe sa vite ndryshimesh që dukeshin të pamundura. Tirana ka probleme, por dikur ishin vendbanime pa qytet. Aty ku sot njerëzit shijojnë qytetet së bashku me turma turistësh, në Shkodër, Berat, Lezhë, Vlorë, përfshirë edhe Belshin e vogël, dikur kishte vetëm parkingje makinash të përziera me lopë dhe viça që vinin për t’u shitur. Gjithçka i ngjante një vendi të harruar nga Zoti. Mijëra e mijëra punonjës të dinjitetshëm, shërbëtorë të padukshëm të shtetit dhe publikut shqiptar… Traktati i anëtarësimit të Shqipërisë, faqja e fundit e një libri të shkruar me mundime të jashtëzakonshme… Në korridoret e spitalit ‘Nënë Tereza’ ecte njeriu me biçikletë dhe nuk dallohej mjeku nga i sëmuri”, u shpreh ndër të tjera kryeministri Rama.