Incident në Dublin: Zbulohet një mjet shpërthyes pranë zonës ku u mblodhën liderët e Komunitetit Politik Europian

Specialistët e ushtrisë irlandeze për çaktivizimin e mjeteve shpërthyese kanë neutralizuar një pajisje të improvizuar, por funksionale, brenda një kompleksi zyrash në qendër të Dublinit. Ngjarja ka ndodhur të premten, në afërsi të ambientit ku krerët e shteteve dhe qeverive kishin shtruar një darkë zyrtare një natë më parë, në kuadër të samitit dyditor të mbajtur në kryeqytetin e Irlandës. Vlen të theksohet se në këtë darkë ka marrë pjesë gjithashtu edhe kryeministri i Shqipërisë, Edi Rama. Autoritetet policore irlandeze bënë të ditur se ndërhynë pas një alarmi për një objekt të dyshimtë gjatë pasdites së së premtes në një ndërtesë të vendosur në Sheshin Merrion. Vetëm një ditë më parë, liderët e Komunitetit Politik Evropian — një platformë që bashkon shtetet anëtare të Bashkimit Europian dhe vendet partnerë jashtë tij — u mblodhën për darkë në krahun tjetër të këtij sheshi. Në njoftimin zyrtar të policisë thuhet se pas verifikimeve paraprake të Gardës, u kërkua menjëherë ndërhyrja e ekipit të Forcave të Mbrojtjes për Asgjësimin e Municioneve Shpërthyese (EOD). Ekspertët ushtarakë arritën ta sigurojnë plotësisht pajisjen, e cila pavarësisht se ishte e papërpunuar, përbënte një rrezik real dhe ishte e zbatueshme. Ndërkohë, autoritetet kanë nisur një hetim të thelluar për të zbardhur rrethanat e ngjarjes. Deri më tani, policia nuk ka specifikuar se kur mund të jetë vendosur bomba dhe nuk ka dhënë detaje shtesë rreth saj. Në darkën e shtruar në Galerinë Kombëtare të Irlandës morën pjesë figura të shquara ndërkombëtare, mes të cilëve presidenti francez Emmanuel Macron, kryeministri britanik Andy Burnham dhe ai kanadez Mark Carney, i cili ishte i ftuar special në këtë ngjarje. Për mbarëvajtjen e samitit dyditor, autoritetet vendosën rrethuesa të rrepta sigurie dhe bllokuan akset rrugore pranë Sheshit Merrion, duke e cilësuar këtë operacion si masën më të madhe të sigurisë të ndërmarrë ndonjëherë në vend. Në këtë samit mori pjesë edhe presidenti i Ukrainës, Volodymyr Zelenskiy, i cili megjithatë nuk ishte i pranishëm në darkë, pasi po zhvillonte një takim me të dërguarit e posaçëm presidencialë amerikanë, Jared Kushner dhe Steve Witkoff, në një zonë në periferi të Dublinit. Punimet e samitit vijuan edhe të premten me një takim joformal të udhëheqësve të Bashkimit Europian, i cili u zhvillua në një lokacion tjetër, rreth 1.5 kilometra larg pikës ku u konstatua prania e mjetit shpërthyes.