Vendim i pazakontë në Prishtinë: Prokurori dërgon në paraburgim 59-vjeçarin pasi lopa e tij futet në oborrin e gjykatës

Një ngjarje tejet e pazakontë dhe me përmasa absurde është shënuar në kryeqytet, ku një qytetar ka përfunduar prapa grilave për shkak të kafshës së tij shtëpiake. Ngjarja ka ngritur shqetësime lidhur me mënyrën e interpretimit të dispozitave ligjore në raste të ngjashme. Bëhet fjalë për 59-vjeçarin Hashim Miftari nga fshati Hajvali, i cili mbrëmjen e së premtes u detyrua ta kalonte në Qendrën e Paraburgimit. Masë kjo e cila u mor direkt me urdhër të prokurorit të Prokurorisë Themelore në Prishtinë, Blerim Igrishta. Sipas informacioneve zyrtare, Miftari u ndalua nga organet e rendit dhe iu caktua ndalimi prej 48 orësh, pasi nuk kishte arritur të mbante nën kontroll njërën nga lopët e tij, e cila ishte shkëputur nga tufa. Ngjarja ka ndodhur gjatë pasdites së së premtes, rreth orës 16:00, kur kafsha ka ecur deri në oborrin e Gjykatës në Graçanicë, duke u futur brenda hapësirës së këtij institucioni. Pas incidentit, Policia ka intervistuar si dëshmitarët ashtu edhe personin e dyshuar. Megjithatë, pavarësisht rrethanave, prokurori Blerim Igrishta ka nxjerrë vendim për ndalimin e tij policor për 48 orë. Gjatë dhënies së deklaratës, Miftari është arsyetuar se kafsha i kishte humbur dhe se një gjë e tillë kishte ndodhur për herë të parë, duke shpjeguar se nuk kishte pasur qëllim keqdashës. Mirëpeshimi i shpjegimit të tij nuk u mor parasysh nga ana e akuzës. Ndaj 59-vjeçarit, prokurori Igrishta ka iniciuar tashmë procedurë penale, duke e ngarkuar atë me veprën penale “Asgjësimi apo dëmtimi i pasurisë”, e cila rregullohet sipas nenit 321 të Kodit Penal të Republikës së Kosovës.