Operacion antidrogë në Gjakovë: Vihet në pranga i dyshuari, sekuestrohen substanca narkotike dhe para

Një person është arrestuar nga Policia e Kosovës në Gjakovë, nën dyshimin e bazuar për veprimtari të paligjshme me lëndë narkotike, pasi gjatë një kontrolli të detajuar në banesën e tij janë zbuluar sasi të ndryshme droge. Ngjarja është regjistruar të premten, rreth orës 09:00, në rrugën “Haxhi Zeka” në këtë qytet. Gjatë bastisjes së shtëpisë dhe hapësirave përcjellëse, efektivët e rendit kanë gjetur dhe konfiskuar tri qese najloni me 13.91 gramë substancë të dyshuar narkotike të llojeve kokainë, MDMA dhe ekstazi, si dhe 14.19 gramë substancë tjetër që dyshohet të jetë marihuanë. Veç lëndëve narkotike, autoritetet e sigurisë kanë sekuestruar edhe dy peshore digjitale, të cilat përdoreshin për ndarjen e dozave, si dhe 450 euro cash, të cilat dyshohet se janë përfituar nga shitja e paligjshme e substancave narkotike. Sipas raportit zyrtar 24-orësh të policisë, pas përfundimit të procedurave policore, me vendim të prokurorit të shtetit, të dyshuarit i është caktuar masa e ndalimit dhe është dërguar në mbajtje.