Ndeshja Kosovë-Izrael: Policia e Kosovës zbaton planin e rreptë operacional për garantimin e sigurisë

Për ta garantuar një ambient të sigurt gjatë zhvillimit të ndeshjes ndërkombëtare të futbollit në kuadër të Ligës së Kombeve mes Kosovës dhe Izraelit, e cila është paraparë të luhet sot në orën 15:00 në kryeqytet, Policia e Kosovës ka përgatitur dhe po zbaton në praktikë një plan të detajuar operacional me masa shtesë sigurie. Që nga momenti i zbarkimit të kombëtares mysafire në vendin tonë, strukturat policore kanë ndërmarrë një sërë veprimesh mbrojtëse, duke përfshirë eskortimin dhe sigurimin e vazhdueshëm përgjatë të gjithë itinerarit të lëvizjes së delegacionit dhe stafit zyrtar gjatë qëndrimit të tyre në Kosovë. Këto masa të shtuara të sigurisë do të jenë në fuqi edhe gjatë ditës së sotme, në kohën e zhvillimit të takimit sportiv. Gjatë qarkullimit të eskortës zyrtare do të ketë ndërprerje apo kufizime të përkohshme të qarkullimit rrugor, ndaj institucioni i rendit ka apeluar për mirëkuptim nga ana e qytetarëve dhe shoferëve. Të gjitha angazhimet e deritanishme dhe ato gjatë ditës së ndeshjes po koordinohen ngushtë me Federatën e Futbollit të Kosovës (FFK), me qëllim që të sigurohet rend i qetë para, gjatë dhe pas përfundimit të kësaj ngjarjeje sportive. Në këtë linjë, autoritetet kanë përsëritur thirrjen drejtuar tifozëve që të paraqiten në stadium në oraret e caktuara, të përmbahen nga futja e gjësendeve të palejuara apo mjeteve të rrezikshme me përmbajtje të ndaluar, si dhe të kenë me vete biletat dhe dokumentet e identifikimit gjatë hyrjes në ambientet e stadiumit. “Policia e Kosovës, në zbatim të detyrave dhe autorizimeve ligjore, do të kujdeset për ruajtjen e rendit dhe sigurisë publike, ofrimin e sigurisë dhe parandalimin e çfarëdo incidenti të mundshëm. Policia do të bashkëpunojë me FFK-në dhe kompanitë që ofrojnë sigurinë. Si çdo herë Policia falënderon qytetarët për bashkëpunim dhe mirëkuptim në interes të sigurisë së përgjithshme dhe fton ata që për çdo informacion apo rast të kontaktojnë Policinë në 192”, bëhet e ditur në njoftimin zyrtar.