Valë dhune në familje: Policia arreston disa persona brenda 24 orëve për sulme ndaj bashkëshorteve, prindërve dhe fëmijëve

Përmasa shqetësuese e dhunës në familje vazhdon të mbetet sfidë alarmante për shoqërinë tonë, ndërkohë që Policia e Kosovës ka bërë publike raportin e 24 orëve të fundit, ku janë regjistruar një varg rastesh të rënda në disa qytete të vendit, përfshirë Prishtinën, Obiliqin, Pejën, Klinën, Malishevën dhe Gjakovën. Në orët e para të 13 nëntorit 2026, saktësisht në ora 00:20 në Prishtinë, uniformat blu kanë vënë në pranga një shtetas kosovar, pasi dyshohet se ka ushtruar dhunë fizike ndaj partneres së tij me të cilën bashkëjetonte. Gjatë kontrollit, autoritetet kanë konfiskuar një armë zjarri (pistoletë) bashkë me shtatë fishekë, ndërsa me vendim të prokurorit i dyshuari është ndaluar në mbajtje. Po ashtu, në kryeqytet më 12 nëntor rreth orës 18:00, është prangosur një tjetër person, nën dyshimin se në mënyrë të vazhdueshme ka ushtruar dhunë fizike ndaj motrës së jomoshuar. Pas intervistimit në prani të zyrtarit për punë sociale, viktima është vendosur në strehimore, kurse i dyshuari është liruar në procedurë të rregullt me urdhër të prokurorit. Një rast tjetër në Prishtinë është raportuar po më 13 nëntor, ku një baba dyshohet se ka ushtruar dhunë fizike dhe psikike ndaj vajzës së tij të mitur; i dyshuari është intervistuar dhe është lënë i lirë në procedurë të rregullt. Në qytetin e Obiliqit, më 13 nëntor rreth orës 11:30, është arrestuar një burrë pasi ka sulmuar fizikisht të atin. Viktima ka marrë ndihmën e nevojshme mjekësore, ndërsa i dyshuari është dërguar në mbajtje me vendim prokurori. Ndërkaq, në Klinë, më 13 nëntor rreth orës 10:00, është prangosur një person për shkak të dyshimeve se ka përdorur dhunë fizike ndaj bashkëshortes së tij, i cili pas intervistimit është dërguar në qendrën e mbajtjes. Rajoni i Pejës ka shënuar disa raste të ndryshme. Më 13 nëntor është raportuar një ngjarje e datës 27 gusht 2026, ku bashkëshorti dyshohet se ka ushtruar dhunë psikike ndaj gruas së tij. Meqenëse vendndodhja e tij ende nuk është siguruar, ai është shpallur në kërkim nga organet e rendit. Në një rast tjetër të raportuar më 13 nëntor (ngjarje e 10 nëntorit), një baba është hetuar nën dyshimet për dhunë psikike ndaj bijës së tij, por pas intervistimit është liruar në procedurë të rregullt. Po ashtu, në orët e vona të 13 nëntorit (22:20) në Pejë, është raportuar një rast i pazakontë ku bashkëshortja dyshohet se në vazhdimësi ushtron dhunë psikike dhe fizike ndaj të gjithë pjesëtarëve të familjes, duke përfshirë edhe bashkëshortin si viktimë; prokurori ka kualifikuar veprën penale dhe hetimet janë duke vazhduar. Në Komunën e Malishevës, më 12 nëntor, është arrestuar një shtetas kosovar i cili në mënyrë sistematike kishte shkaktuar tensione në shtëpi dhe kishte ushtruar dhunë fizike ndaj prindërve të tij. Viktimave u është siguruar tretmani mjekësor, kurse i dyshuari është dërguar në paraburgim policor pas intervistimit. Ndërkaq, në Gjakovë, më 13 nëntor rreth orës 17:30, është raportuar se një person me probleme të shëndetit mendor ka keqtrajtuar vëllain e tij. Viktima ka pranuar ndihmë mjekësore, ndërsa i dyshuari është arrestuar dhe me vendim të prokurorit është dërguar në mbajtje.