Tentoi të grabiste pompën e derivateve në Prishtinë, por pasi dështoi hoqi maskën dhe tha se “po bënte shaka”

Një tentativë grabitjeje është raportuar mbrëmjen e së premtes në rrugën “Lidhja e Lezhës” në Prishtinë. Sipas raportit të Policisë, ngjarja ka ndodhur më 13 nëntor, rreth orës 21:37, kur një person i maskuar është paraqitur në një pikë të derivateve dhe, nën kërcënimin e thikës, u ka kërkuar para dy punonjësve që ndodheshin në vendin e punës. Megjithatë, i dyshuari nuk ka arritur të marrë para. Pas kësaj, ai ka hequr maskën dhe u ka thënë punonjësve se “ka bërë shaka”, për t’u larguar më pas nga vendi i ngjarjes. Sipas Policisë, pas një kohe i dyshuari është paraqitur te zyrtarët policorë, të cilët ndodheshin në vendin e ngjarjes. Nga ai është konfiskuar një thikë, që dyshohet se është përdorur gjatë tentativës së grabitjes.