Prapaskenat e largimit të Behares nga BBVK: Raporti mjekësor dhe prioriteti për fëmijët

Shtëpia më e famshme në vend, Big Brother VIP Kosova 5, është përfshirë nga një zhvillim i papritur lidhur me banoren Beharja. Ajo është larguar nga gara para disa ditësh, ndërsa mbrëmjen e sotme ka munguar edhe në spektaklin e drejtpërdrejtë 'Prime', pavarësisht ftesës së bërë nga produksioni. Prezantuesi Alaudin Hamiti konfirmoi para publikut se Behares i ishte dërguar ftesa për të qenë e pranishme në studio, por ajo kishte refuzuar kategorikisht të merrte pjesë. “E kemi ftuar të vinte në Prime, por ajo ka zgjedhur të mos jetë pjesë e spektaklit”, deklaroi Alaudini gjatë transmetimit. Nëpërmjet një materiali të shfaqur nga dhoma e rrëfimit, vetë Beharja ka sqaruar arsyet e këtij vendimi drastik. Fokusin kryesor ajo e ka vendosur te mirëqenia e fëmijëve të saj, duke nënvizuar se përballë përgjegjësive prindërore nuk ka vend për hezitim. “Përderisa bëhet fjalë për fëmijët e mi, normal që duhet të mendoj mirë. Për fëmijët e lë pa menduar dy herë”, u shpreh ajo. Nga ana tjetër, gjatë bisedës në studio, Alaudini zbuloi se largimi i saj është mbështetur edhe në një raport mjekësor që ajo ka paraqitur.