Totaj: Qeverisja aktuale prodhoi 'hajna të rinj', Ligji për Byronë duhet të jetë ndëshkues për të gjithë

Kryetari i Komunës së Prizrenit, njëherësh zyrtar i lartë i Partisë Demokratike të Kosovës, Shaqir Totaj, ka adresuar kritika të ashpra ndaj qasjes së kryeministrit Albin Kurti sa i përket luftës kundër korrupsionit dhe funksionalizimit të Byrosë për konfiskimin e pasurisë së pajustifikuar. Në një intervistë për emisionin Frontal, Totaj ka vënë në pikëpyetje efikasitetin e qeverisjes aktuale, duke potencuar se edhe pas shtatë vitesh në pushtet, premtimet për të vendosur kriminelët prapa grilave kanë mbetur vetëm në letër. Sipas tij, përkundër retorikës së vazhdueshme të ekzekutivit, në realitet nuk është shënuar asnjë rezultat konkret në këtë drejtim. “Jemi dëshmitarë se Kurti është në pushtet prej shtatë vitesh dhe ende nuk kemi parë asnjë hajn të dënuar me burg. Përkundrazi, jemi dëshmitarë të shfaqjes së figurave të reja që janë përfshirë në afera të tilla. Ata që kanë grumbulluar pasuri marramendëse pa pasur mbulesë ligjore, duhet të kenë arsye për t'u frikësuar nga ky mekanizëm i ri”, ka deklaruar Totaj. Duke komentuar miratimin e ligjit për Byronë Shtetërore për Verifikimin dhe Konfiskimin e Pasurisë, Totaj ka shprehur shpresën se ky instrument juridik do të zbatohet me integritet dhe nuk do të shndërrohet në një vegël për hakmarrje apo keqpërdorim politik.