Aksident në aksin Lushnjë-Berat: Makina me emigrante del nga rruga, në spital foshnja dhe një pasagjere

Një aksident rrugor ka ndodhur pasditen e sotme në segmentin Lushnjë-Berat, pranë fshatit Kashtbardhë. Një automjet tip “Ford”, i marrë me qira, ka dalë nga rruga dhe ka përfunduar në një kanal të thatë, pasi drejtuesja nuk ka arritur të manovrojë siç duhet në një kthesë. Në mjet po udhëtonin tre motra, të cilat ishin kthyer nga emigracioni në Angli, si dhe një foshnjë rreth dy muajshe. Për pasojë, njëra nga pasagjeret ka marrë lëndime të lehta, ndërsa foshnja është dërguar menjëherë në spitalin e Lushnjës për t’iu nënshtruar kontrolleve të nevojshme mjekësore. Sipas informacioneve paraprake, shkak për këtë dalje nga rruga dyshohet të jetë bërë mungesa e ndriçimit në atë pjesë të aksit rrugor, gjë që e ka bërë të pamundur për drejtuesen që të identifikonte kthesën në kohë. Megjithatë, shpejtësia e kontrolluar e mjetit ka bërë që aksidenti të mos kthehet në një tragjedi, duke shkaktuar kryesisht dëme materiale në automjet. Forcat e rendit kanë mbërritur me shpejtësi në vendngjarje për të kryer hetimet e duhura dhe për të zbardhur rrethanat e plota të këtij incidenti rrugor.