Dyshimet për helmim masiv në Vlorë, CELS kërkon hetim penal për kopshtin nr. 10

Qendra e Shërbimeve Ligjore Evropiane (CELS) ka ndërmarrë hapa ligjorë duke depozituar një kallëzim penal pranë Prokurorisë së Vlorës, lidhur me rastet shqetësuese të helmimit të fëmijëve në kopshtin nr. 10 dhe të disa banorëve të tjerë të qytetit. Organizata kërkon zbardhjen e menjëhershme të ngjarjes, duke kërkuar sekuestrimin e provave materiale dhe vënien para përgjegjësisë të autorëve të mundshëm. Dokumenti zyrtar është dorëzuar më 11 nëntor 2026 pranë Prokurorisë së Gjykatës së Shkallës së Parë të Juridiksionit të Përgjithshëm Vlorë. Sipas të dhënave të CELS, që nga data 6 nëntor, një numër i konsiderueshëm fëmijësh dhe të rriturish janë paraqitur në qendrat shëndetësore me simptoma të rënda si temperaturë, të vjella dhe diarre. Analizat paraprake të kryera në depozitën e ujit të kopshtit kanë evidentuar nivele të pamjaftueshme klori dhe praninë e elementeve ndotëse fekale, ndonëse ende nuk ka një shkak zyrtar të konfirmuar për këtë situatë. CELS ka kritikuar qëndrimet e deritanishme të institucioneve, duke i cilësuar ato si të fragmentuara dhe kontradiktore. Përmes kësaj kërkese, organizata i kërkon organit të akuzës nisjen urgjente të procedimit penal, sekuestrimin e dokumentacionit mbi mirëmbajtjen e depozitave të ujit dhe marrjen e mostrave për analiza të thelluara. Kërkohet gjithashtu kryerja e ekspertizave të pavarura mikrobiologjike, kimike dhe mjeko-ligjore për të garantuar paanshmëri në gjetjen e përgjegjësve. Në deklaratën e saj, CELS nënvizon se nisma është ndërmarrë në mbrojtje të interesit publik, pasi fëmijët janë grupi më i pambrojtur. "Kallëzimi është bërë pa targetuar emra specifikë, por me qëllimin e vetëm për të siguruar një hetim të shpejtë dhe të bazuar në prova, që familjet të marrin drejtësi," thuhet në reagimin e organizatës. Krahas veprimeve ligjore, CELS ka bërë të ditur se do të ofrojë asistencë juridike falas për të gjitha familjet e prekura nga kjo situatë. Në këtë kuadër, u është bërë thirrje prindërve që të tregohen të kujdesshëm dhe të ruajnë me rigorozitet çdo dokumentacion mjekësor apo faturë shpenzimesh që lidhet me trajtimin e fëmijëve.