Zgjatet masa e paraburgimit për mësimdhënësin nga Dragashi, i dyshuar për bashkëpunim me shërbimin sekret serb

Gjykata Themelore në Prishtinë ka marrë vendim për vazhdimin e masës së paraburgimit për Feim Salin, mësimdhënësin nga Dragashi, i cili po përballet me akuza për spiunazh në favor të Agjencisë së Inteligjencës së Serbisë (BIA). Lajmin e ka konfirmuar zëdhënësja e këtij institucioni gjyqësor, Mirlinda Gashi. Ajo bëri të ditur se pas kërkesës së parashtruar nga Prokuroria Speciale e Republikës së Kosovës (PSRK), gjyqtari i procedurës paraprake ka aprovuar kërkesën për vazhdimin e paraburgimit edhe për dy muaj të tjerë për të pandehurin F.S. Kujtojmë se arrestimi i Feim Salit kishte ndodhur më 14 gusht 2026. Ai ishte prangosur nga pjesëtarët e Policisë së Kosovës në pikën kufitare në Merdare, ndërsa procesi gjyqësor ndaj tij vijon nën dyshimet për veprën penale të spiunazhit.