Aktakuzë për vrasjen makabre në Baicë: Viktima u mbyt dhe u varros në gropë nga i pandehuri

Prokuroria Themelore në Prishtinë, përkatësisht Departamenti për Krime të Rënda, ka zyrtarizuar ngritjen e aktakuzës ndaj një personi për veprat penale “Vrasje e rëndë” dhe “Mbajtja në pronësi, kontroll ose posedim të paautorizuar të armëve”. Ngjarja tragjike ka ndodhur më 3 gusht 2025 në fshatin Baicë të Lipjanit. Sipas dosjes së prokurorisë, motivi i këtij krimi dyshohet të ketë qenë një konflikt i çastit mes të akuzuarit dhe viktimës, Enver Bajraktari. Hetimet zbardhin detaje rrëqethëse të krimit, ku i pandehuri fillimisht e ka goditur viktimën me mjete të forta në pjesë të ndryshme të trupit. Më pas, ai dyshohet se e ka lidhur viktimën me litar rreth qafës, duke shkaktuar asfiksi mekanike, e cila rezultoi fatale për jetën e Bajraktarit. Pas kryerjes së vrasjes, autori dyshohet se e ka zhvendosur trupin e viktimës duke e tërhequr zvarrë deri në një gropë, të cilën e ka mbushur me dhe për të fshehur gjurmët e krimit. Po ashtu, i pandehuri dyshohet se ka asgjësuar ose fshehur mjetet e përdorura gjatë ekzekutimit të veprës. Në kuadër të veprimeve hetimore, autoritetet kanë kryer bastisje në vendbanimin e të akuzuarit në Baicë, ku kanë sekuestruar një arsenal armësh të paligjshme, duke përfshirë armë automatike, pushkë dhe sasi të konsiderueshme municioni. Prokurori i çështjes, përmes aktakuzës, i ka kërkuar gjykatës që pas shqyrtimit të provave, ndaj të pandehurit të shqiptohet dënimi maksimal sipas dispozitave ligjore në fuqi.