Ndeshja Kosovë – Izrael: FFK publikon rregullat strikte për tifozët në stadiumin 'Fadil Vokrri'

Federata e Futbollit e Kosovës (FFK) ka dalë me një njoftim të rëndësishëm për të gjithë mbështetësit që do të jenë të pranishëm në stadiumin “Fadil Vokrri” për sfidën ndaj Izraelit. Me qëllim garantimin e sigurisë maksimale dhe mbarëvajtjen e këtij eventi sportiv, institucioni ka bërë të ditur një listë të gjësendeve të ndaluara që nuk do të lejohen të futen në impiantin sportiv. Në stadium është rreptësisht e ndaluar futja e armëve të çdo lloji, mjeteve të mprehta, mjeteve piroteknike si fishekzjarre apo flakadanë, pijeve alkoolike, pajisjeve lazer, dronëve, si dhe mjeteve të zërimit që nuk kanë autorizim. Gjithashtu, ndalohen çadrat dhe çdo banderolë që përmban mesazhe me karakter politik, racist apo diskriminues. Çdo objekt tjetër që mund të cenojë sigurinë e të pranishmëve do të konfiskohet nga autoritetet. Sipas udhëzimeve, çdo tifoz është i detyruar të ketë me vete një dokument identifikimi të vlefshëm, i cili do të verifikohet në hyrje. FFK u bën thirrje pjesëmarrësve që të planifikojnë ardhjen e tyre në stadium sa më herët, pasi kontrollet e sigurisë do të jenë të detyrueshme për të gjithë. Një tjetër detaj i rëndësishëm për drejtuesit e automjeteve është njoftimi se “Prishtina Parking” nuk do të jetë në funksion gjatë zhvillimit të kësaj ndeshjeje. Për të shmangur ngarkesën në trafik dhe vonesat e panevojshme, tifozët këshillohen që parkimin e veturave ta organizojnë në zona më të largëta nga stadiumi. FFK ka mbyllur njoftimin me një thirrje për disiplinë, respekt dhe mbështetje sa më të fuqishme për “Dardanët”, duke kërkuar bashkëpunimin e të gjithë tifozëve për një atmosferë sa më sportive.