Manchester United zyrtarizon Mauricio Pochettinon: Pesë arsyet prapa emërimit të bujshëm

Manchester United ka zyrtarizuar angazhimin e Mauricio Pochettinos si strateg të ri të skuadrës, duke shpalosur njëkohësisht pesë shtyllat kryesore që determinuan zgjedhjen e argjentinasit për të drejtuar “Djajtë e Kuq”. Pochettino do të marrë zyrtarisht frerët e klubit më 18 nëntor, menjëherë pas përmbylljes së obligimeve të tij me Përfaqësuesen e Shteteve të Bashkuara të Amerikës (USMNT). Ai do të pasojë Michael Carrickun, i cili u shkarkua nga detyra të enjten, ndërsa marrëveshja e re e argjentinasit është e vlefshme për dy vjet e gjysmë. Debutimi i tij në stolin e Unitedit do të jetë një sprovë e vështirë: derbi ndaj Liverpoolit në “Anfield” më 22 nëntor. Nëpërmjet një komunikate zyrtare, klubi njoftoi se është arritur dakordimi për ndërprerjen e kontratës së trajnerit me amerikanët, pas ndeshjeve çerekfinale të Ligës së Kombeve të CONCACAF-it kundër Haitit. Manchester United ka vlerësuar lart profilin e Pochettinos, duke veçuar stilin e tij të lojës me intensitet të lartë, qasjen sulmuese, aftësinë për të ndërtuar grupe kompakte dhe historikun e dëshmuar në zhvillimin e talenteve individuale. Klubi gjithashtu theksoi se argjentinasi ka dëshmuar vazhdimisht se mund të performojë në nivelet më të larta të futbollit në kampionate të ndryshme. Pritet që 54-vjeçari të dalë para mediave këtë të premte në rolin e trajnerit të SHBA-së për të diskutuar për takimet me Haitin. Kontakti i tij i parë fizik me strukturat e Manchester Unitedit do të ndodhë pas mbërritjes në Angli, pak para përplasjes me Liverpoolin. Kjo do të jetë përvoja e katërt për Pochettinon në Premierligë, pas periudhave te Southamptoni, Tottenham Hotspur dhe Chelsea. Sipas informacioneve të siguruara, bashkëpronari Sir Jim Ratcliffe ka qenë mbështetësi kryesor i këtij emërimi, ndonëse familja Glazer thuhet se ka luajtur rolin kryesor në përshpejtimin e procesit, ndërkohë që drejtori i futbollit, Jason Wilcox, kishte preferenca të tjera si Eddie Howe. Bisedimet fillestare mes palëve kishin nisur që në muajin tetor. Gjatë kohës në krye të SHBA-së, Pochettino e dërgoi ekipin deri në 1/8 e finales së Kupës së Botës 2026, ku u eliminuan nga Belgjika me rezultatin 4:1. Për ta shkëputur atë nga kontrata katërvjeçare e rinovuar në gusht, Manchester United është detyruar të paguajë një dëmshpërblim prej rreth 10 milionë dollarësh (7.4 milionë funte), një kosto që klubi do ta kishte shmangur nëse do të kishte vepruar gjatë merkatos së verës. Sfidat për trajnerin e ri janë të mëdha, pasi ai trashëgon një skuadër që ndodhet në pozitën e 18-të në tabelën e Premierligës, me vetëm tetë pikë dhe një fitore të vetme në dhjetë xhirot e para të sezonit 2026/27.