Optimist para Izraelit, Dion Gallapeni: Dardanët janë gati për rezultat pozitiv

Mbrojtësi i krahut të majtë të përfaqësueses së Kosovës, Dion Gallapeni, ka vlerësuar lart ambientin brenda ekipit kombëtar. Ai ka bërë të ditur se grupi është duke punuar me përkushtim të lartë dhe motivim maksimal për t'u përballur me sukses në dy sfidat e radhës. Në prag të duelit të rëndësishëm kundër Izraelit, Gallapeni shprehu bindjen se Kosova ka mundësi reale për të nxjerrë një rezultat të favorshëm. Ai gjithashtu nënvizoi se afrimi i futbollistëve të rinj në ekip ka ndikuar dukshëm në rritjen e energjisë pozitive në kampin e Dardanëve. Sipas mbrojtësit, intensiteti i lartë gjatë seancave stërvitore është treguesi më i mirë i seriozitetit me të cilin skuadra po i qaset këtyre ndeshjeve. Gallapeni shpreson që sakrifica dhe puna e bërë në stërvitje të përkthehen në suksese në fushën e blertë. “Atmosfera është mjaft e mirë, duke pasur parasysh peshën që kanë këto dy përballje. Ardhja e lojtarëve të rinj ka injektuar një energji të re dhe pozitive në grup. Përgatitjet po zhvillohen me intensitet të lartë dhe jemi tejet të motivuar. Shpresoj që në fund të dalim me një rezultat pozitiv”, ka deklaruar Gallapeni.