Goditje masive ndaj krimit në 'Dark Web': 354 të arrestuar dhe 210 milionë euro të sekuestruara në operacionin ndërkombëtar

Një operacion gjigant i koordinuar në nivel global kundër rrjeteve kriminale që operonin përmes 'Dark Web'-it ka rezultuar në arrestimin e 354 personave në 14 shtete të ndryshme. Aksioni, i cili ka shkaktuar një goditje të fortë ndaj tregtisë së paligjshme, ka çuar në sekuestrimin e më shumë se 5.7 tonë lëndë narkotike, 209 armë zjarri, si dhe pasuri të konsiderueshme në para cash dhe kriptomonedha, vlera e të cilave kalon shifrën e 210 milionë eurove. Operacioni, i pagëzuar me kodin “TorNado”, u zhvillua gjatë periudhës maj 2025 – tetor 2026 nën drejtimin e Europol-it. Gjatë këtij harku kohor, agjencitë ligjzbatuese ndërmorën qindra kontrolle banesash, duke synuar identifikimin e shitësve dhe blerësve që shfrytëzonin platformat e fshehta për aktivitete kriminale. Hetimet u fokusuan fillimisht te përdoruesit e pesë tregjeve kryesore ilegale që ishin mbyllur më parë nga autoritetet: Archetyp, Bohemia, Nemesis, Kingdom dhe Tor2Door. Pasi platformat u neutralizuan, hetuesit vijuan gjurmimin e personave që qëndronin pas llogarive anonime, duke përfshirë ata që operonin në forume të specializuara, dyqane individuale online dhe aplikacione me komunikim të enkriptuar. Shtetet e Bashkuara të Amerikës kryesojnë listën e arrestimeve me 132 persona, të ndjekura nga Mbretëria e Bashkuar (59), Hungaria (45), Gjermania (41), Franca (23), Holanda (12), Sllovenia (11), Austria (6), Irlanda (5), Çekia (4), Australia (1), Zelanda e Re (13) dhe Finlanda (1). Pjesë e këtij operacioni ishte edhe Mali i Zi, ku autoritetet lokale ndërmorën veprime hetimore, ndonëse nuk u raportua një numër specifik i të arrestuarve. Në vendet evropiane u konfiskuan rreth 950 kilogramë drogë, përfshirë 150 kg amfetaminë në Gjermani, 150 kg ketaminë në Britani, 40 kg MDMA në Holandë dhe 50 kg kanabis në Francë, krahas sasisë së kokainës. Gjithashtu, u gjetën kërpudha halucinogjene, cigare elektronike me THC dhe mbi një milion tableta barnash të kontrolluara. Në Evropë u sekuestruan 57 armë zjarri dhe mbi 60 milionë euro, ndërsa në SHBA u sekuestruan 4.8 tonë drogë, 152 armë dhe mbi 150 milionë euro. Europol-i, i cili ofroi mbështetje teknike dhe analiza forenzike të transaksioneve në blockchain, theksoi se rrjetet kriminale po përshtaten shpejt. Sipas agjencisë, pas mbylljes së platformave të mëdha, krimi po fragmentohet në tregje më të vogla dhe forume të specializuara, duke kërkuar një vigjilencë të vazhdueshme nga forcat e rendit.