Dana White shpërthen ndaj përleshjes në Abu Dabi: 'Sjellje prej budallenjsh, vendi i gabuar për sherre'

Presidenti i UFC-së, Dana White, ka reaguar ashpër pas incidentit të dhunshëm që përfshiu ish-kampionin e peshës “bantamweight”, Merab Dvalishvili, dhe kampionin e peshës së lehtë të PFL, Usman Nurmagomedov. Ngjarja e tensionuar ndodhi në ambientet e hotelit “Yas Hilton” në Abu Dabi, duke shkaktuar reagime të shumta në komunitetin e arteve marciale të përziera. Gjatë konferencës për shtyp para eventit UFC 334 në Nju Jork, White nuk ka ngurruar të dënojë veprimet e palëve të përfshira. “Është një sjellje qesharake dhe budallallëk i pastër. Tani të gjithë ndodhen prapa hekurave,” deklaroi kreu i UFC-së, duke shtuar se hoteli nuk është aspak vendi i përshtatshëm për të bërë marrëzira të tilla. Incidenti ndodhi të mërkurën, ndërsa Dvalishvili po zhvillonte një intervistë në prag të eventit “Real American Freestyle” (RAF). Sipas pamjeve, Nurmagomedov iu afrua atij së bashku me një grup personash, duke e provokuar verbalisht para se ta godiste në fytyrë. Përplasja fizike eskaloi shpejt, duke i shkaktuar Dvalishvilit një plagë të hapur në fytyrë. Autoritetet policore në Abu Dabi kanë ndërhyrë menjëherë, duke arrestuar tetë persona të përfshirë në sherr, ndërsa dy të tjerë u ndaluan pasi regjistruan ngjarjen me celularë. Të 10 individët janë dërguar për procedim të mëtejshëm në Prokurorinë Publike, megjithëse identitetet e tyre nuk janë bërë ende zyrtare. Si pasojë e kësaj ngjarjeje, organizatorët e eventit RAF kanë konfirmuar se Usman Nurmagomedov është përjashtuar nga pjesëmarrja në garën e së shtunës. Ndërkohë, po punohet që Dvalishvili të jetë në gjendje të marrë pjesë në përballjen e tij kundër Marlon Moraes, në varësi të rrjedhës së procedurave ligjore. Në lidhje me spekulimet për një kalim të mundshëm të Nurmagomedovit në UFC, Dana White ka qenë kategorik. Ai sqaroi se luftëtari rus është i lidhur me kontratë me PFL dhe se UFC nuk ka pasur asnjë komunikim me të. Për White, ky incident jo vetëm që dëmton imazhin e sportit, por e bën çështjen e së ardhmes së Nurmagomedovit krejtësisht të parëndësishme përballë problemeve ligjore që ai ka aktualisht në Abu Dabi.