Ish-agjenti i BIA-s jep detajet: Milan Radoiçiq ka braktisur Serbinë për t'u vendosur në Rusi

Milan Radoiçiq, ish-nënkryetari i Listës Serbe dhe personi kryesor i dyshuar për organizimin e sulmit terrorist në Banjskë, mësohet se është larguar nga Serbia dhe ka marrë rrugën drejt Rusisë. Këto pretendime janë ngritur nga Milan Zvezdanoviq, ish-inspektor i Agjencisë së Sigurisë dhe Informacionit të Serbisë (BIA), gjatë një interviste televizive dhënë për N1. Duke u mbështetur te të dhënat e tij brenda strukturave të BIA-s, ai konfirmoi se Radoiçiq tashmë ndodhet në territorin rus. I pyetur nëse arratisja e tij është bërë me miratim zyrtar apo përmes rrugëve ilegale, ish-inspektori nënvizoi se figura në fjalë nuk ka pasur nevojë për autorizime formale, duke e lidhur këtë me ndikimin e madh që ka Partia Progresive Serbe (SNS) në vend. "Atij nuk i duhej asnjë leje", u shpreh prerazi Zvezdanoviq. Sipas dëshmisë së tij, largimi i Radoiçiqit ka ngritur alarmin dhe ka prodhuar pakënaqësi brenda qarqeve të caktuara të BIA-s, për të cilat ai pohon se kishin lidhje të ngushta biznesi dhe aktivitete të paligjshme me të. Kjo arratisje vjen pavarësisht faktit se gjykata kishte marrë masa shtrënguese ndaj tij, duke i konfiskuar pasaportën, i kishte ndaluar largimin nga shteti dhe e kishte detyruar të paraqitej rregullisht në stacionin policor. Në lidhje me këto zhvillime, gazetarët ishin drejtuar më 29 tetor me pyetje zyrtare pranë Gjykatës së Lartë për të verifikuar nëse Radoiçiq po i respektonte masat e sigurisë, mirëpo deri në momentin e publikimit të lajmit nuk kishin pranuar ndonjë përgjigje.