Gjendja alarmante në shëndetësi, Kadrijaj: Qytetarët po përballen me sfida të rënda për mbijetesë

Gjatë interpelancës me ministrin e Shëndetësisë, Arben Vitia, deputetja e Aleancës për Ardhmërinë e Kosovës (AAK), Time Kadrijaj, ka ngritur shqetësime serioze lidhur me situatën aktuale në këtë sektor. Ajo është ndalur te mungesa e vazhdueshme e barnave onkologjike dhe te rasti tragjik i një pacienteje që humbi jetën si pasojë e sëmundjes së kancerit. Parlamentarja Kadrijaj ka kërkuar llogaridhënie nga ekzekutivi për afatet e nisjes së zbatimit të Ligjit për Sigurimet Shëndetësore. Duke vënë theksin te vështirësitë e mëdha që hasin pacientët për të sigurimin e medikamenteve të nevojshme, ajo i bëri thirrje Qeverisë që kujdesin shëndetësor ta vendosë në krye të agjendës shtetërore. "Shëndetësia është çështje e dinjitetit njerëzor. A është shëndetësia prioritet i kësaj qeverie? Aman, bëjeni prioritet, se qytetarët janë në hall", u shpreh Kadrijaj gjatë fjalës së saj në foltoren e Kuvendit. Më tej, ajo solli në vëmendje mesazhin rrëqethës të një qytetari, i cili ndërroi jetë për shkak të pamundësisë për të siguruar terapinë, duke cituar pyetjen e tij: “A me jetu, a me ble barna?”. Sipas deputetes Kadrijaj, një thirrje e tillë duhet të shërbejë si kambanë alarmi për çdo zyrtar dhe ligjvënës, duke kërkuar reflektim të menjëhershëm institutional dhe ndërmarrjen e hapave konkretë për t'i dhënë fund krizës në shëndetësi.