Debat i ashpër në Kuvend për barna, Ismaili kërkon llogaridhënie nga shteti, Vitia: Nuk jam polic

Çështja e mungesës së barnave dhe sfidat me furnizimin në sistemin shëndetësor të vendit kanë prodhuar debate të nxehta në seancën e sotme plenare të Kuvendit të Kosovës, ku është mbajtur interpelanca me ministrin e Shëndetësisë, Arben Vitia, e thirrur pas rastit tragjik të vdekjes së një pacienteje me kancer gjiri që kishte mbetur katër muaj pa terapi. Gjatë fjalës së tij, deputeti i Partisë Demokratike të Kosovës, Uran Ismaili, ka ngritur alarmin mbi gjendjen e rëndë në institucionet shëndetësore, duke bërë thirrje që fokusi i debatit politik të kthehet te qytetarët dhe përgjegjësia institucionale, e jo te përkatësitë partiake. Ai vuri në dukje se shumë pacientë po mbeten pa terapitë e domosdoshme për trajtimin e sëmundjeve të tyre. Ismaili ka kritikuar ashpër përpjekjet për ta politizuar këtë çështje jetike, duke paralajmëruar se përplasjet mes partive po e zhvendosin vëmendjen nga vuajtjet reale të pacientëve dhe familjeve të tyre, të cilat vazhdojnë të përballen me barriera të rënda financiare e administrative për sigurimin e medikamenteve. Duke trajtuar aspektin e përgjegjësisë shoqërore, deputeti i opozitës përmendi rastet kur qytetarët humbin jetën si pasojë e këtyre mangësive, duke kërkuar reflektim të thellë për shkaqet dhe adresim të përgjegjësive, ndërsa theksoi se ndërkohë që një pjesë e kostove mbulohet nga shteti, barrën kryesore financiare vazhdojnë ta mbajnë vetë qytetarët. Në kundërpërgjigjen e tij, ministri i Shëndetësisë, Arben Vitia, mbrojti punën e dikasterit që drejton, duke pohuar se sektori i shëndetësisë ka shënuar progres dhe se ky ritëm zhvillimi do të vijojë edhe në të ardhmen. Sa i përket dyshimeve për abuzime dhe parregullsi, Vitia qartësoi se roli i tij nuk është ai i një organi hetues apo gjyqësor, duke shtuar se për këto çështje tashmë janë vënë në lëvizje organet kompetente të rendit dhe ligjit. "Duhet ta dimë një gjé: është rast unik, një auditim i cili u iniciua nga Ministria e Shëndetësisë dhe Bordi që i ka gjetur këto të dhëna... Por tash unë nuk mundem, se s'jam as polic, as prokuror e as gjykatës, e besa as fizikisht nuk jam i përgatitur që të shkoj të përballem me ata njerëz pa forcën e ligjit. Tash ligji merret me këtë çështje", u shpreh ministri Vitia para deputetëve.