Debat i ashpër në Kuvend për barna, Arben Vitia: Nuk jam as polic e as prokuror

Seanca plenare e Kuvendit të Kosovës është shoqëruar me debate të ashpra gjatë interpelancës me ministrin e Shëndetësisë, Arben Vitia. Deputeti i Partisë Demokratike të Kosovës, Uran Ismaili, ka ngritur alarmin lidhur me mungesën e barnave esenciale në sistemin publik shëndetësor, duke kërkuar që ky diskutim të mos politizohet, por të vendosë në qendër pacientët dhe llogaridhënien institucionale. Duke marrë fjalën në foltore, Ismaili u shpreh se shumë qytetarë po mbesin pa trajtimin e duhur mjekësor për shkak të mungesave në institucione. Ai nënvizoi se furnizimi me barna mbetet detyrim parësor i shtetit dhe nuk duhet të shihet përmes prizmave partiake, duke shtuar se debatet sterile po e largojnë vëmendjen nga hallet reale të familjeve që detyrohen t'i blejnë vetë ilaçet. Ligjvënësi i PDK-së kërkoi ndërgjegjësim dhe veprim urgjent institucional për situata ku mungesa e ilaçeve rrezikon jetë njerëzish, duke përmendur shpenzimet e rënda financiare që rëndojnë mbi xhepat e qytetarëve për shërbimet shëndetësore. Në kundërpërgjigjen e tij, ministri i Shëndetësisë, Arben Vitia, mbrojti punën e dikasterit që drejton, duke pohuar se sektori i shëndetësisë ka shënuar hapa para dhe se ky trend pozitiv do të vijojë. Duke u ndalur te raportet e auditimit të kërkuara nga vetë ministria dhe bordi i saj, Vitia theksoi se tashmë rasti i takon institucioneve të drejtësisë. “Duhet ta dimë një gjë: është rast unik, një auditim i cili u iniciua nga Ministria e Shëndetësisë dhe Bordi që i ka gjetur këto të dhëna. Por tash unë nuk mundem, se s’jam as polic, as prokuror e as gjykatës, e besa as fizikisht nuk jam i përgatitur që të shkoj të përballem me ata njerëz pa forcën e ligjit. Tash ligji merret me këtë çështje”, u shpreh Vitia gjatë fjalës së tij.