Gati “Fadil Vokrri”: Bllokohen rrugët dhe shtohet siguria para supersfidës Kosovë-Izrael

Në prag të përballjes mes Kombëtares së Kosovës dhe asaj të Izraelit, e vlefshme për Ligën e Kombeve, autoritetet kanë ndërmarrë masa të rrepta sigurie në perimetrin e stadiumit “Fadil Vokrri” në kryeqytet. Efektivët e Policisë kanë bllokuar qarkullimin e automjeteve në të gjitha akset rrugore që të çojnë drejt stadiumit, ndërkohë që në disa zona janë vendosur shirita sigurie me synim garantimin e rendit publik dhe mbarëvajtjen e plotë të ngjarjes. Dueli mes dy përfaqësueseve do të zhvillohet të shtunën, duke filluar nga ora 15:00, në stadiumin “Fadil Vokrri” në Prishtinë. Aktualisht, “Dardanët” pozicionohen në vendin e dytë të Grupit B3 me pesë pikë në konton e tyre, aq sa ka edhe Irlanda që mban pozitën e tretë. Objektivi kryesor i Përfaqësueses së Kosovës mbetet ruajtja e vendit në Ligën B edhe për ciklin e ardhshëm garues. Ndërkohë, gjatë muajit dhjetor, skuadra kosovare do të kuptojë emrat e kundërshtarëve në rrugëtimin eliminues për Kampionatin Evropian 2028, fazë kjo që do të startojë në muajin mars të vitit të ardhshëm. Për sa i përket historikut të ndeshjeve direkte, Kosova dhe Izraeli janë ndeshur tri herë deri më tani. Përballjet e mëparshme regjistrojnë dy barazime, si dhe triumfin e Kosovës me rezultatin minimal 1:0 në takimin e luajtur më 12 nëntor 2023, po ashtu në Prishtinë.