Dokumentimi i krimeve të luftës, Haxhiu: Për herë të parë viktimat u regjistruan individualisht nga shteti

Kryetarja e Kuvendit të Kosovës, Albulena Haxhiu, ka zhvilluar një takim pune me drejtorin ekzekutiv të Institutit të Krimeve të Kryera Gjatë Luftës në Kosovë, Atdhe Hetemi, i cili i ka dorëzuar asaj raportin vjetor të punës së këtij institucioni. Përmes një publikimi në rrjetet sociale, Haxhiu bëri të ditur se gjatë këtij takimi është njohur nga afër me angazhimet dhe sfidat e Institutit gjatë këtij viti, duke veçuar procesin e verifikimit të të dhënave për secilën viktimë veç e veç, proces ky që rezultoi me publikimin e listës preliminare në korrik. Ajo theksoi se ky shënon një moment historik, pasi institucionet e vendit për herë të parë kanë arritur të regjistrojnë viktimat e luftës një nga një, duke u bazuar rreptësisht në dokumente dhe dëshmi të verifikuara. Sipas saj, ky dokumentim i saktë përbën përgjigjen më të fuqishme ndaj përpjekjeve të Serbisë për mohimin e krimeve të kryera. Në fund, kreu i Kuvendit konfirmoi se ky institucion ligjvënës, i cili ka miratuar ligjin për themelimin e IKKL-së, do të mbetet mbështetës i palëkundur i këtij misioni, duke u shprehur mirënjohje drejtorit Hetemi dhe gjithë ekipit për profesionalizmin dhe ndjeshmërinë në trajtimin e çdo emri dhe dëshmie.