Pse macja juaj ju pret para derës? Këto janë gjashtë arsyet pse e bën këtë sjellje

Nëse keni vënë re se macja juaj mjaullin pa pushim apo ju pret me padurim në prag të derës çdo herë që ajo është e mbyllur, nuk bëhet fjalë thjesht për një kafshë këmbëngulëse. Specialistët e sjelljes së maceve dhe studime të ndryshme shkencore hedhin dritë mbi atë që fshihet pas këtij fenomeni, duke filluar nga kurioziteti i pastër e deri te lidhja e fortë emocionale me njeriun e tyre. Dyert e mbyllura shpesh shkaktojnë shumë më tepër shqetësim te macet sesa mund të mendojnë pronarët e tyre. Gërvishtjet, zërat dhe pritja e gjatë para dhomës shpjegohen përmes mënyrës se thellë se si këto kafshë ndërtojnë marrëdhënien e tyre me njerëzit. Macet kanë një dëshirë të zjarrtë për të ditur saktësisht se çfarë po ndodh në ambientin tjetër. Karen Sueda, e cila është bihejvioriste veterinare, ka shpjeguar se kjo lidhet ngushtë me një lloj frike se mos po humbasin diçka të rëndësishme. Nga ana tjetër, macet ushtrojnë një kontroll të natyrshëm mbi territorin e tyre, që në këtë rast është shtëpia. Konsulentja e sjelljes së maceve, Ingrid Johnson, shpjegon se kafshët kontrollojnë aksesin në hapësirë, territorin dhe nevojat e tyre themelore, pasi kjo instinktivisht i ndihmon të mbijetojnë si gjuetarë dhe si pre. Ajo shton gjithashtu se macet nuk e rrokin dot faktin se dera është mbyllur vetëm përkohësisht, ndaj përjetojnë ndjesinë sikur zona e tyre e sigurisë u mor papritur. Ato e urrejnë mungesën e zgjedhjes Bihejvioristja Jane Ehrlich vë në dukje se macet nuk mund të tolerojnë tre gjëra kryesore: të mos kenë kontroll, të mos kenë mundësi zgjedhjeje dhe çdo ndryshim në mjedisin e tyre. Një derë e mbyllur i përfshin të tria këto elemente, dhe pikërisht në ato momente macja mund të mos dëshirojë domosdoshmërisht të përfshihet në atë që ndodh atje, por do patjetër të kuptojë se për çfarë bëhet fjalë. Shoqëria njerëzore mbetet prioritet Gjatë vitit 2017, në revistën 'Behavioral Processes', studiuesit pranë Universitetit Shtetëror të Oregonit morën në shqyrtim 38 mace, ku gjysma jetonin në bashkëjetesë me njerëz dhe gjysma tjetër në strehë. Koteleve iu vunë në dispozicion ushqim, lodra, aroma të ndryshme dhe prania njerëzore. Sipas të dhënave kërkimore, gjysma e maceve zgjodhën shoqërinë e njeriut mbi çdo gjë tjetër, madje duke e lënë ushqimin në plan të dytë. Pronari përfaqëson strehën e tyre të sigurisë I njëjti grup studiuesish botoi një tjetër hulumtim rreth lidhjes mes maceve dhe pronarëve të tyre në revistën 'Current Biology' në vitin 2019. Macet kaluan dy minuta në një dhomë të panjohur me pronarin, dy minuta të vetmuara dhe më pas dy minuta të tjera pasi pronari u kthye përsëri. Tek 64.3 për qind e koteleve dhe 65.8 për qind e maceve të rritura, ekspertët identifikuan një lidhje të sigurt. Kjo shifër është pothuajse e barabartë me përqindjen e fëmijëve që shfaqin lidhje të shëndetshme me prindërit e tyre, e cila llogaritet në 65 për qind. Autorja kryesore e studimit, Kristyn Vitale, arriti në përfundimin se pjesa dërrmuese e maceve e konsiderojnë pronarin e tyre si një burim absolut sigurie. Përballimi i vështirë i ndarjes Studiuesit nga Universiteti Federal i Juiz de Fora në Brazil publikuan një anketë që përfshinte 223 mace në revistën 'PLOS ONE' gjatë vitit 2020. Te 13.5 për qind e tyre, përkatësisht te 30 mace, pronarët vunë re sjellje që dëshmonin praninë e ankthit nga ndarja. Format më të shpeshta të kësaj sjelljeje përfshinin dëmtimin e objekteve, mjaullitjen e tepruar dhe urinimin jashtë vendit të caktuar. Këto vështirësi shfaqeshin më shpesh në ato familje ku macja nuk kishte lodra të përshtatshme apo kafshë të tjera për shoqëri. Autorët bëjnë thirrje për kujdes, pasi këto konkluzione bazohen te perceptimi i vetë pronarëve për sjelljen e kafshës gjatë mungesës së tyre dhe ende nuk janë konfirmuar përmes vëzhgimeve direkte. Sueda thekson se mjaullima intensive dhe e pandërprerë, veshët e ulur poshtë dhe fishkëllimat mund të përbëjnë sinjale të një shqetësimi real. Nëse keni dyshime apo jeni të shqetësuar për gjendjen e kafshës suaj, këshillohet që të kontaktoni një veteriner për të përjashtuar çdo lloj problemi mjekësor.