Ben Shimon thur elloge për “Dardanët”, zbulon dilemat e fundit rreth dy titullarëve para duelit nesër

Në prag të përballjes së nesërme në kuadër të xhiros së pestë të Grupit B3 në Ligën e Kombeve, përzgjedhësi i Përfaqësueses së Izraelit, Ran Ben-Shimon, ka dalë para mediave për të ndarë pritshmëritë e tij rreth këtij dueli sfidues ndaj Kosovës. Gjatë konferencës për shtyp, strategu izraelit u ndal te gjendja fizike e grupit, duke konfirmuar se dy prej futbollistëve kryesorë mbeten ende në pikëpyetje për shkak të shqetësimeve fizike. “Revivo dhe Solomon janë duke u testuar për ta parë situatën. Do ta dimë gjendjen e tyre më vonë”, deklaroi Ben-Shimon në fjalën e tij. Duke folur për kundërshtarin, ai nuk i kurseu vlerësimet për kombëtaren e Kosovës, duke e cilësuar këtë takim si një provë mjaft të vështirë dhe konkurruese. “Kosova dhe Izraeli kanë nivel pak a shumë të njëjtë, janë të vogëla si kombëtare relativisht. Sa i përket rezultateve të kaluara nuk bazohemi tek historia. Me të vërtet Kosova ka një ekip të mirë por do të shohim se si do të jetë nesër”, përfundoi trajneri izraelit.