Përplasje e ashpër në distancë: Isa Mustafa i kthen përgjigje të prerë Vjosa Osmanit

Ish-kryeministri i Kosovës, njëherësh dikur bashkëpartiak, Isa Mustafa, i është kundërpërgjigjur me gjuhë të ashpër ish-presidentes Vjosa Osmani, pas deklaratave të kësaj të fundit të dhëna gjatë një paraqitjeje televizive, ku ajo kritikoi ashpër figurat kryesore politike në vend, duke përfshirë edhe kabinetet e kaluara qeverisëse. Gjatë një interviste, Osmani kishte ftuar ekzekutivin aktual të udhëhequr nga Albin Kurti që të distancohet nga praktikat e së kaluarës, duke u shprehur se ata nuk duhet të shndërrohen në kopje të gabuara të qeverive të kaluara, duke përmendur emrat e Isa Mustafës dhe Hashim Thaçit. Ajo gjithashtu adresoi kritika të rënda ndaj ish-kryeministrit Avdullah Hoti, deputetes Hykmete Bajrami dhe gjashtë deputetëve të LDK-së që kishin kundërshtuar marrëveshjen për çështjen e presidentit, duke i akuzuar ata madje se i shërbejnë interesave të caktuara. Në lidhje me këto akuza, portali ynë ka kontaktuar ish-kryeministrin Isa Mustafa për një prononcim, i cili zgjodhi të jetë tejet i shkurtër dhe përmbledhës ndaj kritikave të drejtuara ndaj tij. “Është dëm të merrem me të. Është katandisur keq”, u shpreh shkurtimisht Mustafa. Ndërkohë, ndaj deklaratave të Osmanit ka reaguar menjëherë edhe ish-kryeministri dhe deputeti aktual, Avdullah Hoti, i cili e ka cilësuar qasjen e saj si një formë të papranueshme të angazhimit politik. “Turizmi politik është aktivitet joetik në politikë. Koha po i sqaron të gjitha. Kur mbaron sezoni i turizmit politik, mbetesh në rrugë, i frustruar”, ka deklaruar Hoti.