Përshkallëzim i tensionit: Garda Revolucionare e Iranit pretendon shkatërrimin e radarit amerikan në Bahrein

Korpusi i Gardës Revolucionare Islamike të Iranit (IRGC) ka njoftuar se forcat e saj kanë shkatërruar një sistem radarësh amerikanë për paralajmërim të hershëm në Bahrein, si kundërpërgjigje ndaj një incidenti të ndodhur në jug të vendit. Sipas njoftimit zyrtar, ky operacion nga njësitë hapësinore të Gardës erdhi si reagim i drejtpërdrejtë ndaj një sulmi të regjistruar të enjten ndaj një kulle telekomunikacioni në Qarkun Sirik, në Iranin jugor. IRGC e ka cilësuar këtë sulm si një “paralajmërim serioz” drejtuar Uashingtonit, duke kërkuar ndalimin e menjëhershëm të provokimeve ajrore dhe veprimtarive të paligjshme të naftës në Ngushticën e Hormuzit. Po ashtu, Garda Revolucionare ka theksuar se trupat e saj ndodhen në gatishmëri maksimale operacionale, të përgatitura për t'u kundërpërgjigjur pa kufizime gjeografike nëse përsëriten akte të tilla agresioni. Mbretëria e Bahreinit është vendi ku strehohet selia e Flotës së Pestë të Marinës së Shteteve të Bashkuara, një nyje kyçe për operacionet detare të Uashingtonit në Gjirin Persik dhe zonat përreth. Nga ana tjetër, Komanda Qendrore e SHBA-së (CENTCOM) deklaroi të mërkurën se forcat amerikane po vijojnë punën pa ndërprerje për të garantuar lundrimin e lirë të anijeve tregtare në Ngushticën e Hormuzit, ndërkohë që po zbatojnë në mënyrë rigoroze bllokadën detare ndaj Iranit. Sipas të dhënave të CENTCOM, rreth 1.7 miliardë fuçi naftë bruto kanë kaluar përmes këtij aksi strategjik nën mbrojtjen e ushtrisë amerikane gjatë muajve të verës. Ky zhvillim vjen në një periudhë kur Presidenti i SHBA-së, Donald Trump, ka shfaqur një qasje dukshëm më të rreptë ndaj Teheranit. Të enjten, kreu i Shtëpisë së Bardhë deklaroi se Uashingtoni nuk ka më nevojë për një marrëveshje me Iranin, duke i kërkuar zëvendëspresidentit JD Vance – i cili ishte angazhuar në iniciativa diplomatike – që t'i kushtohet çështjeve të brendshme. Trump po kështu bëri të ditur se udhëheqësit e Arabisë Saudite, Katarit, Kuvajtit, Emirateve të Bashkuara Arabe dhe Bahreinit i këtij e kishin lutur të shmangte sulme më të gjera kundër shtetit iranian. Pavarësisht përshkallëzimit ushtarak, procesi diplomatik i ndërmjetësuar nga Katari dhe Pakistani mbetet i hapur. Teherani ka bërë të qartë se çdo rikthim në tryezën e bisedimeve zyrtare me Uashingtonin kushtëzohet nga plotësimi i kërkesave të tij, të cilat përfshijnë heqjen e sanksioneve, ndalimin e bllokadës detare të porteve iraniane, zhbllokimin e aseteve të ngrira dhe ndërprerjen e konfliktit në të gjitha frontet.