Afera e Alta Bankës: LSDM akuzon Mickoskin dhe Slaveskin për lidhje me skandalin financiar

Lidhja Socialdemokrate (LSDM) ka ashpërsuar sërish tonet ndaj kryeministrit Hristijan Mickoski, duke ngritur akuza të reja lidhur me hyrjen e Alta Bankës në tregun vendor. Sipas kësaj partie, sa herë që shtrohen pyetje rreth përgjegjësisë për këtë bankë, kreu i ekzekutivit reagon me panik për ta mbrojtur atë. Nga kjo forcë politike shtrojnë pyetjen se nga çfarë frikësohet realisht Mickoski, duke aluduar se dokumentet për hyrjen e institucionit financiar mund të zbardhin origjinën e kapitalit, transaksionet dhe lidhjet e mundshme me qarqe të errëta. Socialdemokratët insistojnë se dyshimet çojnë drejt një skeme pastrimi parash, për të cilën fajësojnë drejtpërdrejt dyshen Mickoski–Slaveski. Në komunikatën e partisë theksohet se Trajko Slaveski ka pranuar publikisht se hapat e ndërmarrë kanë ardhur pas konsultimeve me kreun e qeverisë. Duke përmendur hetimet në Serbi, ku banka në fjalë dyshohet për parregullsi të rënda financiare dhe bllokim të llogarive të qytetarëve, LSDM vlerëson se drejtuesit vendorë po përpiqen të fshehin gjurmët për t'i ikur përgjegjësisë. Nga ana tjetër, opozita kërkon reagim urgjent nga prokurori Nenad Saveski për të thyer heshtjen dhe për të vepruar mbi kallëzimet penale. Përgjegjësia direkte, sipas tyre, i takon Trajko Slaveskit për dyshimet rreth keqpërdorimit të detyrës zyrtare dhe mungesës së mbikëqyrjes adekuate gjatë procesit të blerjes. Në fund, LSDM shtron pyetjen se përse nuk janë bërë verifikimet e nevojshme për pronarin Davor Macura dhe origjinën e dyshimtë të kapitalit të tij. Partia kërkon masa paraprake, përfshirë pezullimin e përkohshëm të Slaveskit nga funksioni, për të parandaluar çdo ndërhyrje të mundshme në prova dhe dëshmitarë, duke kërkuar nga organet e drejtësisë pavarësi dhe veprim në përputhje me ligjin.