Lutfi Dalipi, talenti që i tha 'PO' Kosovës: Rritja e jashtëzakonshme e 20-vjeçarit që po shkëlqen në Zvicër

Kombëtarja e Kosovës është pasuruar me një emër mjaft premtues për të ardhmen. Bëhet fjalë për Lutfi Dalipin, 20-vjeçarin që ka vendosur t’i bashkohet “Dardanëve”, duke lënë pas një sezon mbresëlënës në futbollin zviceran. I lindur më 23 maj 2006 në Zvicër, me rrënjë nga Presheva, Dalipi ka hedhur hapat e parë të karrierës së tij në shtetin helvet. Zhvillimi i tij futbollistik mori një kthesë pozitive në vitin 2020, kur ai u bë pjesë e akademisë së njohur të Young Boysit. Edhe pse përfaqësoi Zvicrën në grupmoshat e reja, duke numëruar dy paraqitje me ekipin U21, talenti i ri zgjodhi që rrugëtimin e tij me seniorët ta vazhdojë nën fanellën e Kosovës. Kjo vendimmarrje i dha fund dilemave rreth së ardhmes së tij ndërkombëtare, pasi në garë për shërbimet e tij ishin edhe federatat e Zvicrës, Shqipërisë dhe Portugalisë. Aktualisht, Dalipi është në pronësi të Young Boysit, por është duke zhvilluar një sezon të shkëlqyer si i huazuar te skuadra e Vaduzit. Statistikat e tij janë mbresëlënëse: në 13 ndeshje të kampionatit, ai ka tundur rrjetën pesë herë dhe ka asistuar në nëntë raste, duke u konfirmuar si një ndër lojtarët më efikasë të ligës.