Dënim me burg për ish-drejtorin e TEC 'Manastir': Shkaktoi dëm milionësh në buxhetin e ndërmarrjes

Gjykata Themelore në Manastir ka shqiptuar dënimin me dy vjet burg për ish-drejtorin e TEC 'Manastir', Pece Matevski. Ai u shpall fajtor për veprat penale të shpërdorimit të detyrës zyrtare dhe autorizimeve gjatë një procesi të prokurimit publik për nxjerrjen e djerrinës. Sipas vendimit të shkallës së parë, veprimet e tij kanë shkaktuar një dëm financiar prej rreth 2.9 milionë eurosh në një tender që kapte vlerën e 11 milionë eurove. Çështja lidhet me një tender të vitit 2022 për nxjerrjen e djerrinës në minierën Brod Gneotino. Kontrata i ishte besuar kompanisë manastirase 'Rud Kop', pasi oferta e kompanisë 'Granit' nga Shkupi u eliminua nga gara. Aktakuza thekson se 'Granit' i plotësonte të gjitha kriteret teknike dhe kishte paraqitur ofertën më të favorshme ekonomike, por përjashtimi i padrejtë bëri që ata të mos merrnin pjesë në ankandin elektronik. Trupi gjykues argumentoi se Matevski, në bashkëpunim me tre anëtarë të komisionit të ekspertëve, i mundësoi kompanisë 'Rud Kop' përfitim të paligjshëm përmes diferencës së çmimeve të ofruara. Sipas përllogaritjeve gjyqësore, dëmi i shkaktuar TEC 'Manastir' kap vlerën e saktë prej 178.370.319 denarësh. Sa i përket anëtarëve të komisionit të ekspertëve, gjykata vendosi dënime me kusht prej një viti burg për secilin, me kusht që të mos përsërisin veprën penale brenda një periudhe dyvjeçare. Po ashtu, dënime me kusht morën edhe tre punonjës të Byrosë së Prokurimit Publik, ndërsa tre anëtarë të tjerë të Komisionit të Prokurimit Publik u shpallën të pafajshëm dhe u liruan nga të gjitha akuzat.