Zvarritja e Ligjit për Specialen, Tahiri akuzon qeverisjen: Nuk është dokument i NASA-s që të mos procedohet

Deputeti i Aleancës për Ardhmërinë e Kosovës, Besnik Tahiri, ka adresuar kritika të ashpra ndaj institucioneve qendrore për shkak të dështimit për të proceduar në Kuvend projektligjin për plotësim-ndryshimin e Ligjit për Dhomat e Specializuara. Në një kohë kur vendi ndodhet vetëm një javë larg vendimit përfundimtar për mundësinë e shkuarjes në zgjedhje të parakohshme, ai ka dënuar praktikën e lënies së çështjeve me peshë nacionale për momentet e fundit. Përmes një reagimi publik, ligjvënësi ka theksuar se funksionimi i shtetit nën presionin e krizave tregon një qasje të gabuar qeverisëse. "Sot, një javë para se Kuvendi të vendosë nëse vendi do të shkojë në zgjedhje apo jo, përsëri të gjitha temat serioze mbesin për 24 orët e fundit. Shikojeni ku ka rënë kjo shoqëri nën këtë mënyrë qeverisjeje, gjithçka shtyhet, gjithçka lihet për fund, ndërsa institucionet funksionojnë vetëm nën presionin e krizës. Pse nuk kthehet Ligji në Kuvend nga Ministria e Drejtësisë? Ai Ligj nuk është ndonjë dokument analitik i NASA-s. Është ligj, me disa nene, që mund të diskutohet, ndryshohet dhe votohet. Pse kjo logjikë anti-shtetërore? Kujt po i lëmë ngile kështu?", ka shkruar Tahiri. Krahas kësaj çështjeje, deputeti ka ngritur shqetësimin edhe për mungesën e një debati serioz institucional lidhur me procesin e zgjedhjes së presidentit dhe temat e tjera jetike për funksionimin e vendit. "Pse nuk flitet seriozisht për një shtet funksional dhe llogaridhënie? Sepse duket se qëllimi nuk është zgjidhja e krizave, por kalimi nga një krizë në tjetrën. Kjo nuk është qeverisje. Është shtyrje e vazhdueshme e problemit deri në minutën e fundit. Shteti nuk qeveriset në 24 orët e fundit.", ka shtuar ai.