Thellohet skandali rreth Russell Brand: Përballet me gjashtë akuza të reja për abuzim pak ditë pas dënimit me burg

Komediani britanik Russell Brand ndodhet sërish në qendër të vëmendjes, pasi është përballur me gjashtë akuza të reja që lidhen me abuzimin seksual dhe sulmet ndaj grave. Kjo ngjarje vjen vetëm pak ditë pasi ai u shpall fajtor për një akuzë përdhunimi dhe tri akuza për sulm seksual, vendim që i solli një dënim prej 10 vitesh e gjashtë muajsh heqje lirie. Sipas informacioneve të bëra publike, gjashtë gra kanë hedhur dritë mbi episode të reja të dhunës seksuale dhe sjelljeve shtrënguese nga 51-vjeçari. Valë e re e denoncimeve vjen pas hulumtimit të nisur në vitin 2023, i cili nxiti viktimat e tjera të paraqiteshin në polici, duke i dhënë një hov të ri hetimeve që rezultuan me dënimin e tij fillestar. Një prej viktimave, e njohur në hetime me emrin Alex, ka dëshmuar se Brand ka kryer marrëdhënie seksuale me të pa pëlqimin e saj gjatë kohës që ata ishin në një lidhje, duke injoruar plotësisht kundërshtimin e saj. Ndërkaq, një grua e dytë ka deklaruar se ai ka vazhduar aktin intim me të pavarësisht lutjeve të saj të njëpasnjëshme që të ndalonte. Ajo ka treguar se ishte vetëm 19 vjeç kur e takoi për herë të parë komedianin gjatë një shfaqjeje stand-up në vitin 2007. Një rast i tretë përfshin një punonjëse në një ambient në Londër gjatë vitit 2015, e cila ka treguar se një kolege e kishte njoftuar se Brand gjendej në tualetin e personave me aftësi të kufizuara dhe e kishte ftuar duke i thënë se “Russell të do”. Sipas dëshmisë së saj, komediani, i cili në atë periudhë ishte i lidhur me bashkëshorten e tij aktuale Laura Brand, u përpoq ta kapte ndërsa shtiret kinse kishte nevojë për letër higjienike. Nga ana e tij, Russell Brand i ka mohuar vazhdimisht pretendimet për çdo sjellje të pahijshme seksuale, duke u deklaruar i pafajshëm gjatë procesit gjyqësor. Ai e ka cilësuar sjelljen e tij të mëparshme ndaj grave si “të papranueshme, por të ligjshme”. Gjatë dëshmisë në sallën e gjyqit, ai theksoi se “pëlqimi është themelor, thelbësor, i nevojshëm dhe në shumë mënyra më i rëndësishëm sesa vetë akti seksual”. Gjatë shpalljes së vendimit pas një gjyqi katër-javor, gjykatësi Benathan e cilësoi Brandin si një “grabitqar seksual”, duke shtuar se fama e tij kishte shërbyer si mburojë deri në momentin kur mediat publikuan akuzat në vitin 2023. Gjykatësi shprehu vlerësimin e tij për “vendosmërinë dhe guximin” e grave që iu drejtuan drejtësisë, duke u shprehur se “pavarësisht se çfarë veshin gratë, ku shkojnë ose çfarë pinë, ato kanë të drejtë të thonë jo dhe të kërkojnë drejtësi kur grabitqarët seksualë si ju, Russell Brand, veproni pa pëlqimin e tyre”. Ndërkaq, Policia Metropolitane e Londrës ka konfirmuar se gjatë kohës së gjyqit janë regjistruar akuza të reja ndaj Brandit. Autoritetet kompetente po analizojnë raportet e dorëzuara për të përcaktuar hapat e ardhshëm ligjorë.