Arifi ashpër ndaj Kurtit: Po gënjen hapur mërgatën, situata me mjekët është alarmante

Sekretari i Përgjithshëm i Aleancës për Ardhmërinë e Kosovës, Avni Arifi, ka drejtuar akuza të rënda ndaj kryeministrit Albin Kurti, duke e akuzuar atë për mashtrime të hapura ndaj bashkatdhetarëve në diasporë. I ftuar në një edicion special, Arifi u shpreh i zhgënjyer me qasjen dhe trajtimin që kreu i ekzekutivit po i rezervon mërgatës kosovare, duke e cilësuar retorikën e tij si të pavërtetë dhe fyese. Sipas tij, kreu i qeverisë ka dhënë premtime boshe gjatë takimeve me diasporën, duke përmendur çështjen e ndotjes së ajrit dhe filtrave të Korporatës Energjetike të Kosovës, të cilat sipas Arifit janë siguruar përmes projekteve të mëparshme që datojnë nga viti 2018. Po ashtu, Arifi ka vënë në pikëpyetje edhe pretendimet e qeverisë për kinse kthimin e mjekëve nga jashtë, duke sfiduar narrativën zyrtare. Ai theksoi se realiteti në terren është krejt tjetër, pasi shumica e mjekëve specialistë dhe profesionistëve të shëndetësisë përballen me papunësi dhe po synojnë largimin nga vendi.