Gjithçka gati për supersfidën: Kosova dhe Izraeli sot zbresin në “Fadil Vokrri” për seancat e fundit stërvitore

Kombëtarja e Kosovës dhe ajo e Izraelit do të mbajnë sot seancat e tyre përmbyllëse stërvitore, në prag të ndeshjes tejet të rëndësishme që do të zhvillohet të shtunën në kuadër të Ligës së Kombeve. Federata e Futbollit e Kosovës (FFK) ka bërë publike agjendën zyrtare për të dyja skuadrat, ku pritet që trajnerët dhe lojtarët të paraqiten para mediave dhe më pas të zhvillojnë stërvitjet në fushën e stadiumit “Fadil Vokrri” në kryeqytet. Sipas orarit të përcaktuar, delegacioni i Izraelit do ta hapë ditën me konferencën për shtyp duke filluar nga ora 11:00, ndërsa menjëherë pas saj, në orën 11:30, do të zbresë në fushë për të kryer stërvitjen zyrtare. Nga ana tjetër, “Dardanët” do të dalin para përfaqësuesve të mediave në orën 14:20, kurse seanca stërvitore e Kosovës është planifikuar të nisë nga ora 15:00. Kujtojmë se përballja direkte mes Kosovës dhe Izraelit është caktuar të luhet këtë të shtunë, duke filluar nga ora 15:00, në ambientet e stadiumit “Fadil Vokrri” në Prishtinë.