Stil dhe magji festive në Londër: Amanda Holden të gjithë sytë nga vetja me pallton luksoze

E njohur për stilin e saj të pakompromis, ylli i televizionit britanik Amanda Holden ka mahnitur publikun gjatë një mbrëmjeje festive të organizuar këtë të enjte në kryeqytetin anglez. Ajo ishte figura kryesore në rolin e nikoqires për aktivitetin e njohur “Great Reindeer Race” dhe ceremoninë e ndezjes së dritave të festave të fundvitit në Fulham Pier të Londrës. Moderatorja 55-vjeçare ngjalli vëmendjen e të gjithëve me një paraqitje tejet elegante, duke u shfaqur e veshur me një pallto luksoze prej gëzofi artificial me print leopardi nga marka e njohur “Queens of Archive”, çmimi i së cilës llogaritet rreth 450 paund. Veshja e saj u dallua për detajet e bardha në jakë dhe mansheta, ndërsa kombinimi u plotësua në mënyrë perfekte me një palë çizme të bardha me majë. Gjatë kësaj ngjarjeje të mbushur me atmosferë festive buzë lumit Tamiz, Amanda u shoqërua nga personaliteti i njohur televiziv, Mark Wright, me të cilin ndau momentet më të bukura të mbrëmjes. Për herë të parë në këtë zonë u zhvillua gara e veçantë e drerëve të Krishtlindjeve, ku gjashtë varka të ndriçuara në formë dreri garuan mbi ujërat e lumit Tamiz. Pasi përfundoi komentimin e garës, Mark Wright iu bashkua moderatores në mol për të kurorëzuar mbrëmjen me ndezjen zyrtare të dritave festive. Duke ndarë emocionet e saj për këtë organizim, Amanda u shpreh se dashuria e saj për festën e Krishtlindjeve është e madhe dhe se idenë e garës në lumin Tamiz e kishte pëlqyer që në momentin e parë që e kishte dëgjuar. “Jam plotësisht e dashuruar pas Krishtlindjeve, ndaj kur dëgjova për një garë drerësh në Tamiz, e kuptova se kjo nuk ishte një festë e zakonshme. Londrën e pret një spektakël i veçantë”, u shpreh ajo.