Tahiri kritikon qeverisjen: Çështjet kyçe po lihen për momentin e fundit, ku është Ligji për Specialen?

Deputeti i Aleancës për Ardhmërinë e Kosovës, Besnik Tahiri, ka ngritur shqetësimin se temat me peshë të madhe shtetërore po zvarriten vazhdimisht deri në momentet e fundit të vendimmarrjes. Sipas ligjvënësit të AAK-së, kjo qasje po shfaqet sërish, vetëm një javë para se Kuvendi të diskutojë mundësinë e shpërndarjes së tij dhe shkuarjes së vendit në zgjedhje të reja. Ai theksoi se organet drejtuese të vendit ndërmarrin veprime vetëm atëherë kur ndodhen nën presion ose përballë ndonjë krizë të hapur. "Përsëri të gjitha temat serioze mbesin për 24 orët e fundit", ka shkruar Tahiri. Në fjalën e tij, ai ka sjellë në vëmendje edhe çështjen e Ligjit për Gjykatën Speciale, duke i drejtuar një pyetje publike Ministrisë së Drejtësisë për arsyet e moskthimit të tij në Kuvend për shqyrtim. "Pse nuk kthehet Ligji në Kuvend nga Ministria e Drejtësisë? Ai Ligj nuk është ndonjë dokument analitik i NASA-s. Është ligj, me disa nene, që mund të diskutohet, ndryshohet dhe votohet", u shpreh ai. Po ashtu, Tahiri ka kërkuar një qasje shumë më serioze dhe përgjegjëse edhe sa i përket procesit të zgjedhjes së Presidentit të vendit. "Pse nuk ka diskurs serioz për zgjedhjen e Presidentit? Pse nuk flitet seriozisht për një shtet funksional dhe llogaridhënie? Sepse duket se qëllimi nuk është zgjidhja e krizave, por kalimi nga një krizë në tjetrën. Kjo nuk është qeverisje. Është shtyrje e vazhdueshme e problemit deri në minutën e fundit", ka përfunduar deklaratën e tij deputeti Tahiri.